Гюльнара Мягьямедова

Финансаринна бюджетдин ахтармишар гъахру ва къанун уьбхру органарин ляхин албагбан Советдин аьхиримжи заседаниейиъ Дагъустандин Правительствойин председатель Аьбдулмуслим Аьбдулмуслимовди къайд гъапIганси, образованиейин ва сагъламвал уьбхбан бязи идарйириз, никкра, йиккра кади, гизафси жара регионариан аскан ерийин сурсатар хура.

Аьбдулмуслимовди, Мягьячгъа-лайин мектебариз дицисдар сурсатар хувалин дюшюшар ашкар хьувалихъди, гьадму цирклиъ къайда дебккувалин гьякьнаан республикайин Глава Сергей Меликовди тувнайи табшуругъра кIваин гъапIну.

Премьер-министр региондин прокуратурайин кIулиъ айидарихьна, гьаму месэлайиз артухъдиси фикир тувуб ккун апIури, илтIикIну.

Мидланра савайи, Аьбдулмуслимов, пальмайин ччимди инсандин сагъламвализ зарар туври аш, аьгъю апIувал ккун апIури, Роспотребнадзорин республикайиъ айи идарайиз илтIикIну, фицики гизафдар пальмайин ччимдикан зарар адрувалиин умудлу ву. Роспотребнадзорин идарайиан жаваб гъабхьиган, вари халкьдиз мялумат тувди.

Белки пальмайин ччим пальмйир аьхю шулайи уьлкйириъ яшамиш шулайидариз зарарлу даршул. Хъа ухьуз, пальмйир адру ватандин инсанариз, ихь хюндин ччим хайирлу вухьуз.