Мейлан Нежефов

 

Ктабхъурайи гьяфтайи Хив райондин ГъуштIларин кьялан уьмуми образованиейин мектебдин спортзалиъ волейболин талитар кIули гъушнийи. Дурар хусуси метлеб айи операцияйин иштиракчи, «Жюрэтлувализ лигну» ва «Дагъустандин халкьдин игит» медаларин сагьиб Рамис Абукаровдин пешкешариз тешкил дапIнайидар вуйи.

 

Талитариъ ГъуштIил гъулан 3 команда иштирак гъахьнийи. Сабпи йишв лайикьлуди «ГъуштIил-Рапак» командайи гъазанмиш гъапIнийи.

Талитарин натижйир йивури, 9 номинацияйиан ужудар хъуркьувалар улупу спортсменар пулин премйириинди лишанлу гъапIну: Фарман Назарялиев, Тимур Исмяилов, Назим Мягьямедкеримов, Гьяжи Исмяилов, Мурад Ибрагьимов, Ислам Рамазанов, Артур Нурмягьямедов, Аьбдулнасир Нурмягьямедов ва Аьгьмад Рамазанов.

Хив райондин Жямяаьтлугъ палатайин председатель Айдабег Мазовди серенжемдин гьякьнаан ич сюгьбатнаъ чан фикрар ачухъ гъапIнийи. «ГъуштIларин гъулан мектебдин выпускник, жямяаьтлугъ кас Рамисди гъубху ляхниз варитIан заан кьимат тувраза. Вахтназ вуди отпускдиз дуфнайи ватандашди тятIилариз деетнайи урхурайидарин сагъламвал уьбхбан ва дурариз дюзи тербия тувбан гъаразнаъ ади, ужудар талитар кIули гъухну. Закурин наслариз Рамис вари терефарихъанди нумуна духьна. Ва сабсан ражну игитар ихь арайиъ айиб субут апIура. Баракаллагь чаз!» – ктибтнийи дугъу.