Гюльнара Мягьямедова
«Земский доктор/фельдшер» программайин дахилнаъди гъулариз лихуз гъушу духтрарин окладдихьна гьар вазли, гьюкуматдин терефнаан кюмек вуди, 11 агъзурилан 18,5 агъзуриина пул иливура. Гьамдин гьякьнаан 24-пи октябриъ «Дагъустандин правда» газатдиъ гъабхьи пресс-конференцияйиъ Дагъустандин сагъламвал уьбхбан министр Татьяна Беляевайи ктибтнийи.
Татьяна Беляевайин гафариинди, Дагъустандин минздравдиъ республикайин гъулариъ ляхин апIуз ккуни медицинайин гъуллугъчйирихьан аьрзйир кьабул апIувал давам шула.
«Земский доктор/фельдшер» программайиъ иштирак хьпан бадали тялукь яш улупнадар. Лазим вуйиб асас шартIар вуйи пишекарвалин дережа ади хьуб ва гъулаъ, ясана 50 агъзурихьна агьалйир яшамиш шулайи бицIи шагьриъ лихуз юкIв хъади хьуб ву. Земский духтир хьуз ва пул адабгъуз саб ражаритIан шулдар.
Аьрза дибикIну, документар гьязур апIбан кьяляхъ духтриз саб миллион манат пул тувру, хъа гъягъюз читинди вуйи ярхла гъулариъ лихрудариз – саб миллионна хьудварж манат. Фельдшерариз туврайи пулин кьадар 500/750 манат ву», – гъапну Татьяна Беляевайи.
Гъубшу йисан октябрин вазлиъ гъулариз лихуз гъушу медицинайин кьитди айи пишекрариз кьюб окладдин кьадарнаъди пул тувбан гьякьнаан къарар кьабул гъапIнийи. Гьадмура жигьил пишекрарин яшайишдин ужудар шартIар уьрхбан бадали апIурайи ляхин ву.
«2012-пи йисхъанмина республикайин гъулариз лихуз медицинайин саки 2000 пишекар душна. Гъулаз ляхин апIуз душнайи духтрар душваъ яшамиш шули гъузбан месэлара муниципалитетарин кIулиъ айидарихъди швнуб-сабан гъитIибккунча. Ич ахтармишари улупурайиси, гъушу йишваъ хизан ккебгъу духтрар гьадушваъ гъузра. Хъа бязидари, программайиъ улупнайи 5 йис улдубчIвиган, удучIвну душну, медицинайин жара идарйириъ ляхин апIуз хъюгъра», – гъапнийи министри.
«Земский доктор» программайиинди игьтияж айи духтирвалин пишйирин сиягь РД-йин минздравдин сайтдин «Деятельность» – «Земский доктор» пайнаъ чап дапIна. Гизафна-гизафси анестезиологар-реаниматологар, участокдин терапевтар, онкологар, психиатрар, наркологар, педиатрар, рентгенологар ва гьацира жарадар лазим ву.
РД-йин сагъламвалин министерствойин кадрйир кьабул апIру отделиъ гьяфтайин лихру йигъари лисхъан сяаьт 2-хъан «Земский доктор/фельдшер» программайик кучIвуз ккунидарихьан аьрзйир кьабул апIуру. Аьрза тувуз гъюру касдихь образованиейин гьякьнаан документар (диплом, пишекарвалин сертификат, аккредитацияйин гьякьнаан шагьадатнама) хьади ккунду.
