Гюльнара Мягьямедова

Дагъустандиъ медицинайин вузариз, колледжариз урхуз гъягъюз ккунидарин кьадар, гьацира дина урхуз кьабул апIрударин, душваъ пише гъадабгъдарин кьадар аьхюб ву, амма медицинайин цирклиъ кадрйир гьуркIри адар. Себеб? Сабпиб, гизафдариз духтри адабгъурайи маважибдин кьадар цIибди рябкъюра; кьюбпиб, тмундариз, урхбан заведение ккудубкIбан кьяляхъ, думу чпин кIваз ккуни пише дарувал аьгъю шула; шубубпиб, гизафдари ляхниъ учIвуз читинди вуйивал асас себебси гьисаб апIура. Дурарин гафариинди, медицинайин идарайиъ ляхниъ дийигъруган, руш’ват дарди кьабул апIурадар.

 

Йиз фикриинди, кьюбпи себеб ктарди, имбу себебар дюзидар дар. ЦIиб вуйи маважибдикан улхрудариз кIваин апIуз ккундузузки, «Земский доктор» программайиинди духтрариз пулин ужуб кюмек тувра. Мидланра савайи, муниципалитетди му программайиинди лихурайидарин яшайишдин месэлйиризра кюмек апIура.
Шубубпи себебнакан улхуруш, Дагъустандин сагъламвал уьбхбан министерствойин сайтдиъ республикайин медицинайин идарйириъ айи вакансйирин гьякьнаан мялуматар чап дапIна.

Гъийин йигъаз республикайиъ «Земский доктор» программайиинди 66 пишекар (53 духтир ва медицинайин кьялан пишекрар 13 кас) ляхниз кьабул дапIна. Гьацира къайд апIувал лазим вуки, духтирвалин пишейин эйсйир кьабул апIуз гьязур вуйи медицинайин тешкилатар хъана ими. Дидин гьякьнаан газатдин редакцияйиз РД-йин сагъламвал уьбхбан министерствойин мялуматарин гъуллугъну хабар тувра.
Дагъустандин сагъламвал уьбхбан министерствойи гъулариъ айи медицинайин идарйириз духтрар кьабул апIбан ляхин давам апIура. Цци 182 духтриз (гьадму гьисабнаан 157 духтриз ва медицинайин кьялан 25 пишекариз) ляхин а. Региондин сагъламвалин идарйир «Земский доктор» программа ва сагъламвал уьбхбан сабпи звенойин ляхин цIийи алапIбан программа уьмриз кечирмиш апIбиинди пишекрарихъди ацIра. 2012-пи йисхъан башламиш дапIну, гъулариъ ляхин апIуз медицинайин саки 2000 пишекар душна.
«Земский доктор/фельдшер» программайин иштиракчйириз яшнан сяргьятар диврадар. Асасуб пишекариз лазим вуйи пишейин квалификация ади хьувал ва гъулаъ, ясана 50 агъзур агьали яшамиш шулайи бицIи шагьриъ лихуз хуш вуйивал лазим ву. Земский духтир духьну саб ражаритIан пул адабгъуз шулдар, думу программайиинди сабсан ражари (текрар вуди) ляхниъ учIвуз шулдар.
Гьадму программайиинди духтир ляхниз кьабул апIбан кьяляхъ, маважибдилан савайи, духтриз 1 миллион манат пулра тувру. Эгер духтир ляхниъ учIврайи йишв инсанар яшамиш шулайи йишвхьан ярхлаъ вуш, гъягъюз читин йишв вуш, духтриз саб миллионна гьацI пул тувру. Фельдшерариз тувру пулин кьадар 500 агъзур ва 750 агъзур манат ву. Гъулариз тазади гъафи духтрар-пишекрар гьадушваъ лихури гъитувалин жавабдарвал муниципалитетариин илипна. Муниципалитетари духтирвалин пишекрариз яшайишдин кюмекар тувну ккунду.

«Земский доктор» программайиинди пишекрариз йишвар ими. Вакансйирин сиягь Дагъустандин сагъламвал уьбхбан министерствойин сайтдиъ а. Дидин гьякьнаан, лихру йигъари лисхъан сяаьт кьюбдизкьан, РД-йин сагъламвал уьбхбан министерствойин кадрйирин отделиъ йикьрар йитIуз шулу.
Медицинайин гьюрматлу пишекрар! Гъийин девриъ гъулариъра вари жюрейин гъулайвалар а. Хъа шагьрарихьан башкъа вуди, гъулариъ ужудар гьюрматлу инсанар, гьадрарин сагъламвализ кюмек туври, юкIв хъади ктабгъу пишейихъди ляхин апIувал, марцци гьава, саламат уьмур учвуз ккилибгура.