Наргиз Гюлечова

Гьаму йигъари махлукьатлу хабрариан мялум гъабхьиганси, Каспийск шагьрин агьали Рашид Ражабов, мусурман касдиин али буржи тамам апIбан бадали, Меккайин гирами ругариина гьяждиз гъягъюз кIури, ушвра дибисну, кьял’ин 35 килойин гъагънан ипIру сурсатар ва алабхьру палтар айи чантара алди, ликри рякъюъ учIвна.

Узу Рашиддихьан мялуматар гъадагъруган, дугъан рякъюъ учIвну 6-пи йигъ вуйи. Ич сюгьбатнаъ Рашидди, чан мясляаьт хизанари фици кьабул гъапIнуш, ктибтнийи. Балин кьастнакан мялум гъабхьиган, абйир-бабар къаршуди удучIвнийи. Дурариз Рашидра гьяждиз имбударси рягьятди, самолетдиъди душну ккундийи, амма думу чан гафналан улдучIвундар.

«Узу кьастнаан ликри гъягъюрайир вуза. Фицики йиз асас метлеб 2-3 вазлин арайиъ 4 агъзурихьна километр рякъюн манзил ккадапIури, гьадму рякъюъди сарна-сарди, Аллагьдикан фикир апIури, ихь Пайгъамбриз (с.а.в.) салават ва зикр урхури гъягъюб вуйиз.
Рякъюъ жвув Аллагьдиина аманат дапIну учIвнайир вуза. Гьелбетда, читинваларра хьуб мумкин ву, хъа дурарихьан зат гучIурдариз, фицики Аллагьди узу читинвалариъ гъидритбиин умудлу вуза.

Гъи узу ярхла йишвариз ликри гъягъюб кьаст дапIну рякъюъ учIвнайиваликан зат швумал дарза. Гьамусяаьт узуз узу варитIан бахтлу касси гьугъужвназуз. Аллагьдин рякъюъ ади, гирами ругариина гьяж апIуз гъягъюраза. Му дюн’яйиз ухьу вахтназдитIан дуфнайидар дархьа. Аьхиратдикан фикир апIури яшамиш духьну ккунду. Жвувкан Аллагь рази кадаъну ккунду. Гьаддиз узу Аллагь бадали йиз метлебнахьна гъягъюраза.

Душну ккуни рякъ лап ярхиб вуйибдин гъавриъ аза. Гьаддиз гьар йигъан яваш-явашди ккадапIурайи рякъюн манзил ярхи апIураза. Хул’ан удучIву сабпи йигъан 10 километрин манзил ккадапIунза, хъа 5-пи йигъан думу манзил 20 километриина алдапIунза. Жандин кьувват гъубзбан бадали, яваш-явашди рякъ давам апIураза. Аллагьдик, узу сагъ-саламатди гирами ругариина рукьур кIури, умуд кивраза», – гъапнийи Рашид Ражабовди.