Гюльнара Мягьямедова
29-пи августдиъ Дагъустандиз дуфнайи РФ-дин оборонайин министрин заместитель Тимур Иванов ва республикайин кIулиъ айи Сергей Меликов Мягьячгъалайиъ ва Каспийскдиъ тикмиш апIурайи жямяаьтлугъ мяна айи объектар ахтармиш апIуз гъушну.

 

Дурари Мягьячгъалайин ипподром айи терефнаъ диврайи 1224 бицIидариз деъру йишвар айи мектебдин гьязурлугвал, Каспийскдиъ тикмиш апIурайи госпиталиъ гъахурайи тикилишчивалин ляхнар ва Дагъустандиъ Каспийскдин флотилияйин инфраструктурайин, дявдин гъуллугънаъ айидариз диврайи объектарин гьял ахтармиш гъапIну.
Гьаму вари дараматариъ гъахурайи ляхнариз лигбан кьяляхъ Тимур Ивановди ва Сергей Меликовди объектар ахтармиш апIбан натижйир йивбаз ва жара месэлйир гьял апIбаз бахш вуйи совещание кIули гъубхну.

КIваин хурача, ипподром ерлешмиш дубхьнайи райондиъ ачмиш апIуз гьязурди айи мектеб «Образование» милли проектдин дахилнаъди тикмиш дапIнайиб ву. Думу 1-пи сентябриъ абццуз кка.

Ишлетмиш апIру уьмуми йишв 26 агъзур квадратдин метр айи мектеб лап уткануб ва деврин тIалабариз жаваб тувруб ву. Думу юкьуб дараматдикан – филологияйин дарсар кивру корпусдикан, жаради шубуб мертеба дибиснайи ккергъбан классарин корпусдикан, мани хураг тувру йишв ва актовый зал айи жямяаьтлугъ илмарин корпусдикан, кьюб мертеба дибиснайи спортзал ва сирнав апIуз бассейн айи спортдин зонайикан ибарат дубхьна.

1-пи сентябриъ республикайин шагьрариъ ва районариъ 15 мектеб ва 13 бицIидарин багъ ачмиш апIиди.