Умгьанат Сулейманова
Республикайин МВД-йин пресс гъуллугънан кIулиъ айи Гаяна Гариевайи мялум гъапIганси, цци 2025-пи йисан Каспий гьюлликк ккахьдарин кьадар ккудубшу йисантIан кьюб ражари артухъ дубхьна. Асас вуди мицисдар хатIаваларин себеб гьюлин лепйирин гъанихвал ву. Думуган гьюлик кахъуз, сирнав йивуз, иллагьки ички дубхъну штук кучIвуз, ягъли йишварилан штуъ урсуз ихтияр адар. Мицисдар бедбахтваларин дюшюшар Дербент райондиъ, Дербент ва Огни шагьрариъ, Мягьячгъалайиъ, Каспий гьюлиз багахь районариъ кми-кмиди шула.
Улихьна йигъари Дагъ. Огни шагьриъ гьюлин «Гъизилин гъум» кIуру гъирагъдихъ ихь ватанагьли Аслан Гюльмягьямадовди гьюликк ккахърайи шубур риш ккадагъну дугъахъди сабси Дагъ. Огни шагьрин багахь хьайи цIийи Уркарах гъул’ан вуйи Шамиль Баркаев ва Шамхал Шамхаловра иштирак гъахьну. Му игитари гъапIу дирбаш ляхниз лигну, Дагъ. Огни шагьрин глава Замир Гьяжимурадовди дурариз «Чухсагъулин кагъзар» тувну.
Аслан Айдемирович Гюльмягьямадов Дагъ. Огни шагьриъ 1989-пи йисан бабкан гъахьну. Дугъан бина Табасаран райондин Гьемшнигъ гъул’ан ву. Аьхю абйир-бабар улихьна вахтари Дагъ. Огни шагьриз кюч духьну гъафидар ву. Аслан хизандиъ айир сар велед ву. Дугъахъди вуйи гафар-чIалар, телефондихъан гъахьнийич. Дугъан гафариинди, думу йигъан Аслан чан хизандихъди, рягьятвал гъадабгъуз гьюлихъна дуфнайир гъахьну. Ва саб арайиъ шубар гьюлликк ккахьра кIури, гьарйир – сесер гъахьну. Ва Аслан гъидиргну, инсанар гъварч духьнайи йишвахьна жаргъуру. Дишла думу гьюлик кучIвру. Мугъан кьяляхъди шубурсан жигьилар, сар Чичен республикайиан, кьюр Нальчик шагьриан вуйидар, кучIвру. Асланди, штукк ккахьрайи шубур риш гьяракатниинди ккадагъуру, амма мугъаз кюмек апIуз кучIвдарра ккахьуз хъюгъну. Дурар хьайи йишв яманди лепйирин гьяракатвал айи тереф гъабхьну. Гъабшиб ибшри дупну, Аслан хъанара чан кьяляхъди кюмекназ кучIву баяр ккадагъуз хъюгъну. Ва мугъаз кюмекназ ихь Дагъустанлу кьюрсан жигьилар Шамхал Шамхалов ва Шамиль Баркаев ккурсру. Кьюрид Нальчикдиан вуйи жигьилар чIивиди ккадагъуру, хъа Чечен республикайиан вуйир чIивиди имиди ккадагъуз хъуркьундар, думу лепйири лап ярхлаз гъухнийи. Кьяляхъна, МЧС-дин кюмек дубхьну, дугъан майит ккадабгъуру. Му шубур риш Чечен республикайиан гьюлихъна рягьятвал гъадабгъуз дуфнайидар вуйиштIан.
Узу Асландихьан, увуз гучI гъабхьундарнуз, кIури гьерхиган, «Ваъ, Аллагьди гъибикIуб хьибди. Йиз мицисдар дюшюшар швнуб-саб ражари гъахьнийиз», гъапну дугъу.
Хъа гьаммишан Аслансдар касар ихь багахь хьади шулдар. Гьюлин штухъди зарафтар дапIну ккундар. Ихтиятвал дапIну ккунду. Магьа улихьнаси Мягьярамкент райодиъ, 21 ва 17 йисариъ айи кьюр чве гьюликк ккахьну гъийихну.
Мягьячгъалайиъ, абйир-бабар гъулаз душну имиди, 12 йисаъ айи риш, гьюлихъна жикIуз гъушур, ккахъну гъакIну. Аьхиримжи вахтна швнуб-саб мицисдар хатIасуз дюшюшар духьна. Гъи дурар вари ктухидархьа. Нирарихъ ва гьюлихъ хатIалу дюшюшарин кьадар артухъ шулайивализ лигну, гьюлиз багахь вуйи шагьрарин, районарин кIулиъ айидари агьалйирикан ва хяларикан хатIасузвалин къайдйир уьрхюб ккун апIура. Дициб йишвахьна гъушу вахтна, гьарсар бали ва шуру хулаъ чпиз гьаммишан адашна дада ккилигурайиваликан фикир дапIну ккунду.
