Умгьанат Сулейманова
Улихьди ихь гъулариъ мектебариъ урхурайи бицIидари, гьюрматлу пишйир ву кIури, гизафси мялимвал ва духтирвал ктабгъури гъахьну.
Мектебдиъ имидитIан мялимвалин пишейихъ юкIв хъади гъахьи ва чпин думу хиялар кIулиз адагъу пишекрар образованиейин цирклиъ хайлин лихура. Гьадрарин арайиан гьисаб апIуз шулу Дагъ.Огни шагьрин бицIидарин яратмиш апIбарин хулан директор Гьябибат Уьмаровара.
Уьмарова Гьябибат Аьбдул-мютелимовна Табасаран райондиъ ЦIурутIил гъулаъ Мурадялиеварин аьхю хизандиъ бабкан гъахьну. Дугъаз юкьур чи ва шубур чве а. Дугъан адаш Аьбдулмютелим Ватандин Аьхю дявдин иштиракчи вуйи. Дявдин кьяляхъ думу хайлин йисари ЦIурутIил гъулан совхоздин бригадирди, хъа Гьябибатдин дада Эспет Маллялиевна гъулан мектебдиъ марццишин уьбхрурди лихури гъахьну.
Инсандин уьмрин жилгъа ва бахтнан пай дугъаз фицир тербиячи ва мялим алахънуш, гьаддилан хайлин асиллу шулу. Йиз макьалайин игит Гьябибат Уьмаровайи мялимвалин пише ктабгъувалиъ аьхю роль уйнамиш гъапIур дугъан сарпи мялим, урус дишагьли Аьлимурадова Евгения Григорьевна вуйи.
Гьябибат Уьмаровайи ич сюгьбат Евгения Аьлимурадовайин терефназ гъапи чухсагъулин гафарилан ккебгънийи.
– Цци вари Урусатдиъ тербиячйириз ва гьюрматлу мялимариз «Чухсагъул» кIуру акция гъябгъюра. Узузра гъи, мумкинвал амиди, ихь гюрюшнаъ йиз сарпи мялимдиз чухсагъулин гафар пуз ккундузуз. Аьлимурадова Евгения Григорьевна, ич гъулан бализ кьисмат духьну, ич мектебдиъ ккергъбан классариъ мялимди лихуз хъюгънийи. Увуз дугъу кивру дарснан гьяйранвал рябкъюз ккунийкIан! Ихь абйирин мисал айиб ву: уву уьл ипIруган, гъвалахъ дуснайиринра тямягь шулу. Евгения Григорьевнайи дарс кивру вахтна, дугъахъ хъпехъуз иштагь шуйи, дугъаз чан дарснахьна урхурайидарин фикир жалб апIуз аьгъяйи. Гьадму вахтна мялимвалин пишейихъ тямягь гъабхьи узу гъира думу пише давам апIураза. УрчIвудпи класс ккудубкIур, 1978-1982-пи йисари Дербент шагьриъ педучилищейиъ урхури гъахьунза. Дидин кьяляхъ, кьисмат дубхьну, Огни шагьриз жвуваз гъафунза ва йиз мялимвалин тажруба 3-пи нумрайин мектебдиъ ккебгъунза. Мектебдиъ хайлин йисари мялимвалин тажруба гъадабгъну, шагьрин образованиейин управлениейиъ бицIидарин багъарин методистди гъилихунза. 2011-пи йисан Дагъ.Огни шагьрин бицIидарин яратмиш апIбарин хулан директорди дерккунзу.
– Урхбан цIийи йис ккебгъну саб ваз гъабхьну. Мектебдиан гъафи баяр-шубар фициб ляхнихъ хъаъруш, абйир-бабар фикрарикк ккахъну шулу. Уву регьбервал туврайи бицIидарин яратмиш апIбарин хулаъ мектебдиъ урхурайи баяр-шубарин азад вахт фици мянфяаьт кади ишлетмиш апIуз шулу?
– Дагъ. Огнийин ДДТ-йиъ аьлава образованиейин 23 жюрейин игьтияжар гьуркIра – мяълийир ва ялхъвнар апIуз, шиклар зигуз улупура ва гь.ж. Вари дарсар пулсузди вуйич.
– Хъа учвухьна гъюрайи бицIидарин кьадар фукьан ву?
– Учухьна 750 бицIир гъюра. Гъюз ккунидар гизаф а, амма йишвар цIибтIан адарчуз, ич идарайин дараматра Совет гьюкуматдин вахтари дивуб ву. Шагьрин образованиейин кIулиъ айидарин гафариинди, багарихьди жара дарамат дивди. Тамарзуди ккилигурача, гьаз гъапиш чпин бицIидар кружокариз дикIуз гъафи абйир-бабар, йишвар имдар гъапиган, гиранвал кади гъягърували йиз кIваз гъагъ тувру.
– Хъа бицIидар ДДТ-йиз фуну вахтна кьабул апIурачва бицIидар ДДТ-йиз?
– БицIидар учу, август вазлихъан хъюгъну, 15-пи сентябриз кьабул апIури шулча, хъа 16-пи сентябриъ дарсар ккергърайич. Дилихру йигъ адарди, ляхнин вахт гвачIниантIан хябяхъдиз вуйич. Гьар йигъан шубуб сменайиъди лихурача.
