Гюльнара Мягьямедова
5-пи октябриъ Мягьячгъалайиъ урус интеллигенцияйиз дивнайи ядигарин аьтрафариин мялимарин тухмариз (династия) бахш дапIнайи аллея ачмиш гъапIну ва гележегдин наслариз кагъаз айи капсула жилиъ ивну. Серенжемдиъ Дагъустандин образованиейин ва илимдин министр Ягья Бучаев иштирак гъахьну.
Аллея ачмиш апIували мялимдин пишейин важиблувал улупура. Хъа гележегдиъ улихьна вуйи аьсриъ мялимари образование артмиш апIбак, тербия тувбак киву пайнакан мялуматар гъадагъбан бадали, капсула 50 йисалантIан ачмиш апIидар.

«Ухьу ихь мялимариз гьюрмат апIурхьа ва республикайин образованиейин артмиш’валик пай кивдарин гьюрмат мялимдин ва насигьятчийин ярхи йисди кIваълан гьапIрадархьа. Дурари жигьил наслиз чпин аьгъювалар ва тербия туври, зегьмет гъизигну»,– гъапну Ягья Бучаевди.

КIваина хурача, 20-пи аьсрин эвелариъ республикайиз Советарин Союздин жюрбежюр йишвариан Дагъустандин халкьарин образование за апIуз, яшайишдинна экономикайин, политикайин ва культурайин артмиш’вализ кюмек тувуз варжариинди пишекрар гъафнийи. Дурар инженерар, духтрар, мялимар вуйи. Мягьячгъалайиъ урус интеллигенцияйиз бахш дапIнайи Мемориал гьадму касарин гьюрматназ дивнайиб ву.