Мейлан Нежефов

Украинайин жилариин гъябгъюрайи хусуси метлеб айи дявдин операцияйиъ, жюрэтлувал улупури, Хив райондиан варжаринди кьягьялар иштирак шула, гьадму гьисабнаан чпин хушниинди душнайидарра.

Отпускдиз багъри райондиз эскрар гъафиган, муниципалитетдин глава Ярмет Ярметов дурарихъди гюрюшмиш хьуз, райондин администрацияйин терефнаан дурарик кайи аьрзйирин месэлйириз лигури, дурар гьял апIуз чарйир агуру.

Гьаци, улихьна йигъари райондин глава нубатнан ражари чан хушниинди Ватан бадали вуйи дявдин женгарин иштиракчи Селимхан Киберовдихъди гюрюшмиш гъахьнийи.
Гюрюшдиъ Селимханди чан хусуси суал гьял апIбаъ главайихъди саб фикрихьна гъафнийи. Сюгьбатнан аьхириъ райондин администрацияйин терефнаан главайи кьягьял чухсагъул мялум апIру гьюрматнан кагъзиинди лишанлу гъапIнийи.

«Яв гьунар учузси, ихь закурин аргъаж шулайи насларизра нумуна ву, Селимхан. Ярхлаз гъягъюбра лазим дар. Яв гъахи гъардшар Аьдили ва Кибери думу гьаци вуйиб субутра апIура. Учву, шубрид чвйирра СВО-йиъ – жвуван хушниинди иштирак шули, учву улупурайи гьунарари райондин регьбервал гъабхурайи узук хлинццар кивра. Багарихьди гъалибвалра хьади учву ва учвухъди хъайи ватанпервервалин рякъюъ айи ихь баяр вари сагъ-саламатди багъридарихьна хъадакну гъюб марцци кIваан ккун апIураза», – гъапнийи райондин кIулиъ айи Ярмет Ярметовди.

КIваин апIуз ккундучуз: Селимхан Киберов райондин 7-пи созывдин депутатарин корпусдиз дахил шулайи Дардаркент гъул’ан вуйи депутат ву. Хусуси метлеб айи дявдин операцияйиз думу ихь уьлкейиъ мобилизация ккебгъайиз улихь чан хушниинди гъушур ву. Гьаци, цIиб вахтналан кьюрид чвйирра. Гьамус швнуб-саб ражари райондиан агьалйири чпи гьязур дапIнайи гуманитарный гъагъра архаинди гьадгъахьди баярихьна хътапIура. Дугъриданна, вари терефарихъанди гьюрматнан кагъзиз чан эйси алахъну.