Гьадму йигъан Табасарана райондин Хючна гъулан 1-пи нумрайин лицейиз, ХустIил, Гурхун ва Ханак гъуларин кьялан мектебариз цIийи автобусарра жара гъапIну. Табасаран райондин глава М. Къурбановди образованиейин идарйирин директорарихьна жюлгер ва тялукь документар тувну.

Къайд дапIну ккундуки, цци республикайи гъадагъу 51 автотранспорт саки вари муниципалитетариз жара гъапIну. Дурарикан 4 машин Табасаран райондиз тувну. «Мектебдиъ урхурайидарин хатIасузвализ ва гъулайвализ ухьу гьаммишан дикъатлу фикир туврахьа. Улихьди хайлин гъулариъ баяр-шубар мектебариз ярхи рякъюъди ликри гъягъюз мажбур шуйи. Хъа чвлин ва кьюрдун аьхъю вазари дурариз лап читинвалар алахьуйи. Аьхиримжи йисари ихь райондин мектебариз 46 автобус жара апIувалиинди месэла хайлин гьял апIуз гъабхьну», – гъапну Мягьямед Къурбановди.