Гюльнара Мягьямедова

Мягьямед Къурбановди Табасаран райондин агьалйирикан «Ерли жягьтлувалар» проектдиъ жанлуди иштирак хьуб ккун гъапIну.

 

«Дагъустандиъ «Ерли жягьтлувалар» проект уьмриз кечирмиш апIбан дахилнаъди аьрзйир кьабул апIура. Учвуз яшамиш шулайи йишвариъ инсанариз гъулайвалар арайиз хпан гьякьнаан ичв фикрар ачухъ апIуз, теклифар дивуз мумкинвал дубхьначвуз. Конкурсдиъ гъядягъру теклифарин асас шартI проектдиз муниципальный бюджетдиан ва меценатарин дакьатарин гьисабнаан проект пулихъди тямин апIувал ву.

Райондин гьарсаб гъулан жямяаьтдихьан Дагъустан Республикайин экономикайин артмиш’валин министерствойиз чан проект тувуз, конкурсдиъ гъалиб духьну, рякъ’ин асфальт улубзуз, рягьятвал гъадабгъру йишв арайиз хуз, культурайин идара рас апIуз, туризмдин цIийи объектар ва гьацдар жара тикилишар ачмиш апIуз субсидйир гъадагъуз шулу.

Арайиз адагъу проектарин конкурс гьаму йисан гъабхиди, хъа гъалибчйириз пулин дакьатар 2024-пи йисан тувди.
Ерли жягьтлуваларин тереф уьбхюри, субсидйир тувбан конкурсдиз вуйи документар РД-йин экономикайин артмиш’валин министерствойи кьабул ва регистрация апIуру. Лазим вуш, конкурсдиз документар гьязур апIбаъ райондин главайин сарпи заместитель Рамис Уьсмановди кюмек тувди», – къайд гъапIну Мягьямед Къурбановди.

2023-пи йисан Табасаран райондиъ «Ерли жягьтлувалар» проектдиинди Саб вуйи дежурный диспетчерарин гъуллугънан хулариъ (ЕДДС) ва райондин бицIидарин яратмишарин хулаъ капитальный расвалин ляхнар гъахура.
Гьюрматлу ватангьлийир, «Ерли жягьтлувалар» проектдиинди гизаф йишвариъ бицIидарин ва спортдин майднар ачмиш дапIна. Гъулаъ фунуб йишв къайдайиз дубхну ккундуш, шид зигуруш даршиш рякъ апIуруш, агьалйири чпи ктабгъуру.
Гъулаъ му адарич, тму адарич, кIури гьюкмар ва уьлке тахсир апIбан ерина, гьаму учвуз ккабхънайи мумкинвал ишлетмиш апIинай.