Гюльнара Мягьямедова,
Мейлан Нежефов
Урусатдиъ апрелин 1-пи йигъан хьадукран призыв ккебгъну. 2024-пи йисан 1-пи апрелилан июлин 15-пи йигъазкьан 150 агъзур жигьил баяриз Урусатдин яракьлу кьувватарин жергйириъ гъуллугъ гъабхуз дих апIиди. Гьадму кьадарнакан 4 агъзуриинакьан ватандашар Дагъустан республика-йиан ву.
3-пи апрели «Дагестанская правда» газатдин конференцйир гъахру залиъ Дагъустан Республикайин военный комиссар Дайтбег Мустафаевди мялуматарин дакьатарин вакиларихъди вуйи гюрюшдиъ хьадукран призывдин кампания фици кIули гъябгъюраш, ктибтну. Республикайин военный комиссари 2023-пи йисан чвлин призывдин натижйирикан улхури, ккудубшу йисан октябрин-декабрин вазари Урусатдин яракьлу кьувватарин жергйириз Дагъустандиан 3,5 агъзуртIан артухъди ватандашар гьаъбакан ва республикайин улихь дивнайи план тамам апIбакан гъапнийи. Д.Мустафаевди план артухъдира кади тамам гъапIу муниципальный районарин ва шагьрарин ччвурар гъидиснийи.
Чан улхуб давам апIури дугъу гъапиганси, призывдин серенжемар Урусатди гъабхурайи хусуси метлеб айи дявдин операцияйихъди аьлакьалу дар.
«Эскервалин гъуллугъназ дих дапIнайи ватандашар хусуси метлеб айи дявдин операция гъабхурайи йишвариз, ясана Запорожьейин ва Херсондин областариз, Луганскдин ва Донецкдин халкьдин республикйирин ругариина гъуллугъ апIуз гьаърадар», – кьатI’иди гъапнийи Д.Мустафаевди.
Военный комиссари гъапиганси, призывдин комиссияйиз дишлади мялумат тувну, тазади армияйиз гъягъюрайи ватандашдихьан контракт йибтIуз шулу. Дугъаз призывдиинди вуйи гъуллугъ, маважибра, вари льготарра кади, контрактдиинди вуйи гъуллугъназ илтIибкIуз мумкинвал а.
Армияйиъ гъуллугъ апIувал дигиш дубхьнадар: улихьнаси, гьамусра жигьилари сад йисан гъуллугъ апIиди.
«Гъубшу йисан хьадукран вахтна призывдиинди армияйин жергйириз гъушу ватандашар цци вахтниинди чпин хизанарихьна хъадакну гъиди.
Призывдин комиссияйи чан ляхин ккебгъна. Республикайин призывникар уч шлу пунктнаан жигьил эскрарин сабпи десте апрелин 15-пи йигъан гьауб планламиш дапIна», – гъапнийи республикайин военный комиссари.
Дайтбег Мустафаевди журналистарин суалназ жаваб туври, призывдиккан кIул ккадабгъурайидарин кьадар цIиб шули адруваликанра гъапнийи. «Республикайиъ 5 агъзурилан зиина армияйиккан кIул ккадабгъурайидар а. Дурар чпи регистрация дапIнайи йишваъ дихъурадар. Абйир-бабарира чпин велед айи йишв ашкар апIурадар. Дицисдар агбаъ МВД-йин гъуллугъчйири кюмек апIурачуз. Гъубшу йисан 40-риинакьан материалар, уголовный дело гъитIибккбан бадали, силисчивалин органариз тувунча. Гьамусяаьт дурарикан 15-диинакьан судариъ а. Жигьилар азадвалихъ мягьрум дапIну дустагъдиъ итрадар, хъа жаза тувра», — къайд гъапIнийи военный комиссари.
Табасаран райондиан 90 жигьил армияйиз гъахиди
2-пи апрели Табасаран райондин глава – призывдин комиссияйин председатель Мягьямед Къурбановдин жягьтлуваликкди райондин призывдин комиссияйин сабпи заседание кIули гъубшну. Заседаниейиъ гьаму йисан райондиъ хьадукран призыв тешкил апIбан месэлйир гьял гъапIнийи.
Заседаниейиъ райондин военный комиссар Садикь Мурадялиевди 2024-пи йисан апрелин – июлин вазари Табасаран райондин военный комиссариатдин гьисабнаъ айи 1994-2006-пи йисари бабкан гъахьи баяриз эскервалин гъуллугъназ дих апIуваликан мялуматар тувнийи. Дугъу къайд гъапIганси, пландиз асас вуди, райондиъ призывдин комиссияйи 2-пи апрелиъ ляхин ккебгъну. Июлин 15-пи йигъазкьан давам шлу хьадукран призывдин вахтна, Табасаран райондиан 18 йислан 30 йис’инакьан яшар вуйи 90 кастIан артухъ яракьлу кьувватарин жергйириз гъягъиди. Призывникарин фамилйир кайи сиягьар ва повесткйир вахтниинди ВУС-дин (военно-учетный стол) гъуллугъчйирихьна тувна. Призывникарин сабпи пай апрелин 13-пи йигъан республикайин призывникар уч шлу пунктназ гьаъди.
Садикь Мурадялиевдин мялуматарихъ хъпехъбан кьяляхъ Мягьямед Къурбановди ВУС-дин гъуллугъчйириз ва гъуларин поселенйирин главйириз райондин военный комиссариатдихъди аьлакьа уьбхюб, агьалйирин арайиъ гъаврикк ккаъбан ляхин гъабхуб, ватандашар контрактдиинди военный гъуллугъназ жалб апIуб, контрактдиинди гъуллугъ апIурайидариз ва дурарин хизанариз айи льготйирикан ктибтуб табшурмиш гъапIну.
КучIлин хабрарихъ мухъугъанай!
2024-пи йисандин хьадукран призывдин кампания ккебгъбахъди аьлакьалу вуди, Агъул ва Хив районарин военный комиссар Сулейман Гьюсейнов районарин 1994-2006-пи йисари бабкан гъахьи баярихьна илтIикIну. Дугъу къайд гъапIганси, 2024-пи йисан январин вазлиланмина армияйиз гъахру баярин яшар за дапIна. 2023-пи йисан 31-пи декабриз 27 йис тамам гъабшидар запасдиз гъягъюра, хъа эгер жигьилин 2024-пи йисан 1-пи январиъ 27 йис гъабхьнуш, му шубуд йисансана армияйиз гъягърударин сиягьнаъ ахъра.
Агъул ва Хив районарин жигьилари Урусатдин Яракьлу кьувватарин жергйириъ чпин эскервалин буржи гьарган намуслувалиинди тамам апIури гъахьну. Жюрбежюр частариан военный комиссариатдиз ва абйир-бабариз гъюрайи кагъзари гьаци вуйивал субут апIура.
Сулейман Гьюсейновди призывникарикан, ихь районар ва республика варитIан ужуб терефнахъан улупури, уьлкейин яракьлу кьувватариъ гъуллугъ апIуб ккун гъапIну.
«Хьадукран призывдиъ Хив ва Агъул районариан 50 кас армияйин жергйириз гъягъиди. Гьелбетда, гьамусди сикинвал, архаинвал ва ислягьвал ухьуз гьубкIри адрувалиан бализ дуфнайи повестка гъябкъю абана баб пашман шула. Дурарин сефилвалин гъавриъ ахьа. Хъа дюзи мялумат туври, дурар архаин апIуз ккундузуз. Жигьилар анжагъ Урусатдин аьтрафариин чпин сад йисандин арайиъ армияйиъ гъуллугъ апIуз гьаъди. Янаки Урусатдин кьибла терефнан округдиз, Яракьлу кьувватарин кьялан округдиз, Ригъ алабхъру терефнан ва Ригъ гьудубчIвру терефнан округариз, гьацира Кафари флотдиз. Жигьилари оборонайин министерствойин ва Росгвардияйин частариъ гъуллугъ апIиди. Саб гафниинди, Украинайин жилариин гъябгъюрайи хусуси метлеб айи операцияйиъ дурар иштирак шулу кIуру гаф чав кучIал ву. Учвухьна рукьурайи кучIлин хабрарихъ мухъугъанай. Гьаддиз, гьюрматлу агьалйир, ихь арайиъ гъалабалугъвал адарди жигьилар рякъ’ин апIбак учв хусуси пайра кивну, ихь жигьилариз рягьятди ва кьягьялвалин гьевесниинди чпин эскервалин буржи тамам апIуб ккун апIидихьа», – гъапну гъуларин главйирихьна повесткйир рукьури, Сулейман Гьюсейновди.
Призывдин гьякьнаан гьякьлу мялуматар РФ-дин оборонайин министерствойин сайтдиан гъадагъуз шулу. Гьацира 12-пи апрелилан башламиш дапIну, «горячая линия» либхуз хъюбгъди, призывдин гьякьнаан суалар хьади телефондин гьаму нумрариз зенг апIуз шулу: 67-88-86; 68-16-07.
