Гюльнара Мягьямедова

«Дагъустандиъ гъубшу йисандин призывдин кампанйир тешкиллувалиинди кIули гъушну. Гьаму йисан хьадукран призывра гьаци ужуди кIули гъябгъюр кIури, умуд кивраза», – гъапну Дагъустандин Глава Сергей Меликовди РД-йин Оперативный штабдин заседаниейиъ.

 

Думу совещаниейиъ удучIвну гъулху республикайин военный комиссарин вазифйир тамам апIурайи Замирбег Къурабеговди хьадукран призыв ккебгъайиз гъахурайи гьязурлугваларикан ктибтнийи. Гьаму йисан апрелиъ ккебгърайи призывдин вахтнаъ 1994-пи – 2006-пи йисари бабкан гъахьи жигьилариз повесткйир тувди. Республикайин военный комиссариатди призывникарин сиягьар гьязур дапIна. Региондин призывникар уч шлу ва кьушмарин частариз гьаъру пункт вари лазим вуйибдихъди тямин дапIна.
Къурабеговдин гафариинди, 27-пи мартди призывдин комиссйирин председателарихъди ва муниципалитетарин военный комиссарарихъди гъаврикк ккаъбан ляхин гъабхуз уч хьувал планламиш дапIна.

Сергей Меликовди республикайин призывникар уч шлу пунктнан призывдин кампания гъабхуз гьязурлугвал ахтармиш апIуб табшурмиш гъапIну.

«Призыв пландиинди гъябгъювал важиблу ву. Думу ляхин муниципалитетарин кIулиъ айидарианра, призывдин ерли комиссйириланра асиллу шула. АйтIан ляхнарин органарин гъуллугъчйири чпи военкоматарик китIнайи йишвариъ адру призывникарихъди ляхин гъабхуз кюмек апIиди. Армияйиккан кIул ккадабгъбан ляхин дубхьну ккундар. Комиссияйин дахилнаъ муниципалитетариъ жямяаьтлугъ тешкилатарин, жямяаьтдин гьюрмат айи вакилар, машгьур спортсменар, СВО-йин иштиракчйир, мялимар ади ккунду», – къайд гъапIну республикайин кIулиъ айири.

Дагъустандин Главайи призывдин кампанияйикан гьар вазли мялуматар тувуб ккун гъапIну.