Зубайдат Шябанова
Дагъустандин халкьарин сабвалин йигъ Табасаран райондин Хючна гъулан 2-пи нумрайин мектебдиъ яркьуди къайд гъапIну.

Сентябрин 14-пи йигъан мектебдин гьяятар успагьиди кабалгнайи. Мектебдин гьарсаб классди милли майднар ккатIарццнайи. Классариъ урхурайидари абйир-бабарин ва мялимарин кюмекниинди милли хурагар гьязур гъапIнийи ва улихьдин вахтарин авадлугъарихъди чпин майднар ккабалгнийи.

 
Машквран программайин концертдиъ урхурайидари багъри ватандиз бахш дапIнайи мяълийир, шиърар гъурхну, Дагъустандин халкьарин аьдатарикан бицIи сягьнийир улупну ва милли ялхъвнар гъапIну.
Серенжемдиъ Табасаран райондин главайин заместитель Заур Мусаев ва райондин образованиейин управлениейин гъуллугъчи Низами Къурбанов иштирак гъахьнийи.

 
Райондин главайин ччвурнахъан Заур Мусаевди мектебдиъ урхурайидар, мялимар ва серенжемдиз дуфнайи хялар машкврахъди тебрик гъапIнийи.

 
«Ихь республикайиъ жюрбежюр миллетарин вакилар албагну яшамиш шула. Гьарсаб халкьдиз девлетлу культура а, дурари аьсрариинди чпин аьдатар, чIал ва тарих уьбхюра. Сабвалин йигъаз бахш дапIнайи машквру ухьу вари сатIи апIура ва ихь ватандихьна вуйи мани гьиссар хъана мюгькам ва кьувватлу хьуз гъитра. Учву ва вари дагъустанлуйир Дагъустандин сабвалин йигъахъди тебрик апIураза. Гьарсаб хизандиъ ислягьвал, уж’вал ва хушбахтвал ибшри», – гъапнийи Заур Мусаевди.
Дагъустандин сабвалин йигъан Табасарандин вари мектебариъ шадлугънан серенжемар гъушну.
Думу серенжемариъ мектебариъ урхурайи баяр-шубариз багъри культурайин тарихдикан артухъ аьгъювалар ва мялуматар тувувалихъди сабси, Дагъустандин успагьивал чпин улариинди гьякьикьатдиъра рябкъюз мумкинвал гъабхьну.