Наврузбег Керимов
Замир Гьяжимурадов Дагъ. Огни шагьрин главади тяйин дапIну кьюб вазтIан артухъ ву. Дугъаз му шагьур бицIиди имидитIан танишди ву – дугъан дада Дагъ. Огни шагьриъ бабкан гъахьир ву. Ва бицIидиган думу, чав гъапиганси, гьар тятIилари аьхю бабахьна гъюри гъахьну. Гьаци вуйиган, шагьрин учIруди дийигънайи месэлйирин думу ужуйи гъавриъ а.
Дугъриданра, Дагъ. Огнийиъ йисариинди гьял апIуз шули адру гизаф месэлйир уч духьна. Дурарикан асасдар хъархъвсарин, штарин, канализационный турбйирин, кючйириъ дюз дапIну адру рякъярин ва жилихъди аьлакьалу меселйир ву.
Табиаьтдин, инсан яшамиш шулайи йишван марцциваликан ихь сагъламвалин дережа асиллу вуйивал варидиз аьгъяхьуз. Амма, гьяйифки, думу месэла саспи йишвариъ гьеле чан эвелин дережайиъди гъубзну ими. Йиз фикриан, чпи яшамиш шулайи шагьрин тябиаьтдин гьялнахьна вуйи вижнасузвал ихь инсанарин ифдиъ гьадмукьан мюгькамди убчIвнаки, дурарихьан хасиятнан му лишнихьан гьичра азад хьуз шуладар. Коммунальный мяишатдин вакилари гъи гьарсаб объект капитально вуди марцц апIура, ужуб къайдайиз хура, хъа кьюд-шубуд йигълан гьадушв хъана артухъ чиркин шула. Суал арайиз гъюра: шли чиркин апIура? Шаксузди, чпи, шагьристанари, дурарин баяр-шубари, мирас-варисари, багахьлуйири, дустари… Жара юрдариан, вилаятариан, уьлкйириан дуфну, ихь ругариин чиркинвал апIрудар бажагьат ашул.
Замир Гьяжимурадов шагьрин главади лихуз хъюгъхъанмина, Дагъ. Огнийиъ марццишан жигьатнаан аьхю дигиш’валар гъахьну. Асас вуди рякъярин гъирагъ-бужагъар, паркар, кючйир, саб тягьяр вушра, марцц духьна, хъархъвас дабхьру йишвар тяйин апIура. Саб гафниинди, шагьрин марццивал ихь сагъламвалин бина вуйивалин гизафдар гъаври духьнайиб ашкарди рябкъюз хъюбгъна.
Замир Гьяжимурадов гьяфтайиъ сабан чан заместителарихъди сатIиди шагьрин аьгьвалат фициб вуш гюзчивал гъабхуз, гъирагъ-бужагъарилан илдицура. Саб ражари дугъу зарафат кади гъапну: «Ихь уьлкейиъ марццишнан месэла гьял апIбан бадали, аьхю зегьмет дизигну ккунду, гьаз гъапиш ухьхьан чIюрхяр ахьру гъабарин айитIиндикьана хъархъвас абхьуз шуладархьухьан. Ухьу чIуру авчйир вухьа. Гъачай, ихь кючйириъ айи хъархъвас абхьру гъабариз лигухьа. Дурар ичIиди а, амма гургутум жилиин зирзибил дабхьна. Ухьу эвелиъ ихь авчивалин дережа за дапIну ккунду. Ваъ, дустар, ухьу чIюрхишин дарапIуз дудрубгъкьан гагьди, ухьуз марццишинра рябкъидар».
Гъи Дагъ. Огнийиъ, шагьрин идарйиъ лихурайидар вари жалб дапIну, вазли шубуб субботник кIули гъахура. Учв шагьурра, улихьдиси чиркинди имдар, кючйир марцциди рякъюру. Амма гьар йигъан марцц апIурайи йишварихь бязи шагьристанари цIийикIултIан чиркин апIура. Мумкин ву, марццишин уьбхбан бадали хъархъвас абхьру рукьан ишкIарин багахь камерйир китIиш, му месэла гьял шул.
