Зубайдат Шябанова

Гьаму йигъари Табасаран райондин глава Мягьямед Къурбановди муниципалитетдин администрацияйиъ яркьу совещание гъубхну.

 

Совещаниейиъ, 2024-пи йисан гъапIу ляхнин натижйир йивури, гъулан мяишатдин отделин кIулиъ айи Аьгьмед Аваев удучIвну гъулхну.
Дугъан докладдиъ туврайи мялуматариинди, Табасаран райондиъ 8 СПК (гъулан мяишатдин гьясиллувалин кооперативар), 35 КФХ (нежбервалинна фермерарин мяишатар), 10 235 ЛПХ (хусуси касарин подсобный мяишатар) гьяракатнаъ а.

Райондин гъулан мяишатдин уьмуми цирклиз 34,1 агъзур га жилин йишв жара дапIна. Дидкан 31,8 агъзур га жил ишлетмиш апIура.

2024-пи йисан гъулан мяишатдин гьясиллувалин уьмуми гьисабарин кьимат 3,3 млрд манат удубчIвну: набататчивалилан – саки 2 млрд, малдарвалин цирклиан – 1,3 млрд манат. 2024-пи йисан тазади 500 га хътабкру жилар ишлетмиш гъапIну.
Райондиъ гъулан мяишатдин мюгькамди артмиш шулайи циркларикан саб тIумутIчивал ву. 2025-пи йисан тIумтIин багълари райондиъ 1,6 агъзур га жил бисиди. Гъубшу йисан 100 га жилиин тазади тIумтIин багълар ва 7 га жилиин йимишдин гьарар кивна. Гъубшу йисан 19,2 агъзур тонна тIумтIар, 6,5 агъзур тонна йимишар, 5,2 агъзур тонна мейвйир, 5 агъзуртIан артухъ тонна картфар уч дапIна.

Малдарвалин цирклиан 2024-пи йисан 18 агъзур тонна никк ва 2,7 агъзур тонна йикк гьясил гъапIну.
Совещаниейиъ гъябгъюрайи йисан мартдин вазли Бухьнагъ гъулаъ гъушарин мяишат ачмиш апIуз планарик кайиваликанра гъапнийи. Думу фермайиин 15 агъзурихьна пеэр уьрхюз шулу. Душваъ 18 касдиз лихру йишвар улупна.
2024-пи йисан Табасаран райондин гъулан мяишатдин тешкилатари, гьюкуматдин терефнаан кюмек вуди, 72,4 миллион манат субсидйир гъадагъну.