Зубайдат Шябанова

Республикайин сагъламвалин министерствойи манишнахъди сабси табиаьтдиъ конго-крымский геморрагический лихорадка тарабгъру хицIар жанлу шулайи вахт улубкьнайиваликан мялумат тувра.

Пишекрарин гафариинди, му аьжал хру вирус инсандин бедендиъ хицIру кьацI гъивган тарабгъуру. Гьаддиз агьалйир, табиаьтдиз рягьятвал гъадабгъуз гъягъюз ккунидар ихтият духьну ккунду. Республикайиъ хицIари кьацIар дивну, гъагъи уьзриан больницайиъ ахъбан дюшюшар швнуб-саб духьна.
Гьаддихъди аьлакьалу вуди, РД-йин минздравди агьалйириз хицIран кьацIрахьан ихтиятди гъузубси, думу хилиъ дючIрюбкьюбра ккун апIура. Фицики, уьзур ачмиш апIру микробар инсандикна хамраансина тарагъбан хатIа а.

Табиаьтдиз удучIвруган, шлубкьан бедендиин лизи палат алабхьай, шарвлин кюлер атIнариъ аай, гъяцIли йишварикан тялукь кремар кадатай ва гьарсаб кьюб-шубуб сяаьтнак учвук хицI кубчIвнаш лигай.

Эгер учвук хицI кабснаш вая диди кьацI гъивнуш, гьяшарат чIюбкьюб лазим дар. Думу пинцетдихьди вая жуна илбижнайи тIубарихьди, шлубкьан багахьна дидин кIулхъан дибисну, илбицури, уьчIюбгъну ккунду. КьацI гъиву йишвкан спирт вая йод кадатай. ХицI адабгъбан кьяляхъ хилар сябнихьди дижикIну ккунду.
Хъа нагагь температура за шули, бедендик мяхъ кубчIври, гукIнишин кабхъри, кIул, юкьв иццру, жан зяиф гъабхьиш, шлубкьан ухди больницайиз духтрарихьна илтIикIай. Думу уьзрихъди зарафатар шлуб дар.