Халачйирин конкурс ва дуствалин халачи

Зубайдат Шябанова

 
Урусатдин халкьарин сабвалин йисаз бахш вуди, 15-пи августди Табасаран райондиъ, Ургур чвуччвун ва сар чуччун гъалайиин гъабхру «Хилин халачйир Табасарандиъ» фестиваликан учу гъубшу нумрайиъ мялумат тувнийча.

Къайд апIуз ккундучуз, думу фестивалин выставкайиъ хилин халачйир, гьалвар, кюмсар, халача убхру дуркьар масу гъадагъуз шулу. Думу серенжемдиъ гьацира Дагъустандин хайлин районариан дуфнайи фольклорин дестйириз тамаша апIуз ва маракьлу концертдин программайиз лигуз мумкинвал хьибди. Фестивалин программайиъ халкьдин яратмишариан мастер классар ва «Хили гъубху ужубсиб халачи» конкурс гъябгъиди. Думу конкурсдиз фестивализ духнайи халачйирикан варитIан ужудар ва успагьидар гъядягъюру. Конкурсдин спонсорар «Халачйирин караван» компания ва «Мега» Алверин Хал ву.

 
Хилин халачйириз заан кьимат тувуз аьгъю устад экспертари конкурсдиъ «Кут гугарин халачи», «Кут арлдру гьалав ва дидин тарих», «БицIидари халачийик киву пай» – гьаму шубуб номинацияйиъ варитIан ужудар халачйир гъядягъиди.
Тешкилатчйири успагьи ва аьдати дару накьишар, орнаментар айи халачйир айидариз конкурсдиъ иштирак хьуз теклиф дивра.
Кут али халачи номинацияйиъ гъалиб гъахьириз – 50 агъзур манат, кьюбпи йишв гъадабгъуриз – 30 агъзур манат ва шубубпи йишван сагьибдиз 20 агъзур манат тувру.
«Кут алдру гьалав ва дидин тарих» номинацияйиъ сабпи йишваз 30 агъзур, кьюбпи йишваз – 15 агъзур ва шубубпи йишваз – 5 агъзур манат улупна.

 
БицIидарин номинацияйиъ сабпи йишв гъадабгъу халачийиз – 15 агъзур манат, кьюбпи йишваз - 10 агъзур ва шубубпи йишваз – 5 агъзур манат тувру.
Мидланна гъайри, фестивалиъ иштирак гъахьи агьалйириз Табасаран райондин главайин ччвурнахъан Чухсагъулин кагъзар гьязур апIиди.
Халачйирин фестивалиъ варитIан устад халачачйирра кIваин апIиди.
Фестивализ дуфнайи вари хялариз ва иштиракчйириз, му серенжемдик чпин пай киври, Дуствалин халачийик гугар кахуз мумкинвал шулу. Дуствалин халачи дирибшнайи дуркьар фестивалин мяракайин асас йишвахь дивру. Урусатдин жюрбежюр йишвариан ва Дагъустандин хайлин районариан ва шагьрариан дуфнайи хялари сатIиди китIу гугариан арайиз гъафи халачи, дуствалин мани ялав уьбхюри, Табасаран райондин Хючна гъулаъ айи Халачйирин музейдиъ аьсрариз гъубзди.