Мейлан Нежефов

Ихь уьлкейин саки вари шагьрариъ ва районариъ урхбан цIийи йис ккебгъайиз август вазлин аьхиримжи йигъари мялимарин конференцйир кIули гъахури аьдатнаъ абхъна. Гьаци, 29-пи августдиъ Хив райондин РКДЦ-йин дараматдиъ тялукь конференция гъабхну.

 

Уч духьнайидарин улихь образованиейин отделин начальник Назаряли Тарланов удучIвну гъулхнийи. Чан маракьлуди гьязур дапIнайи докладдиъ дугъу ккудубшу урхбан йисандин ГИА-йикан, пишекарвалин дережа за апIру курсариз гъягъюрайи ва думу ляхниз зат фикир тутруврайи, категория гъадабгънайи, заан ччвурариз лайикь гъахьи мялимарикан, конкурсариъ, олимпиадйириъ заан хъуркьувалар улупурайи ва му ляхнариъ саб жюрейин иштираквалра адру мектебарикан, «Точка роста», «150 мектеб» кIуру проектарикан, мектебариъ, спортзалариъ ва бицIидарин багъариъ гъуху расвалин ляхнарикан ва урхбан цIийи йисан мектебарин ва мялимарин улихь дивнайи меселйирикан ктибтнийи.

Конференцияйин вахтна райондин кIулиъ айи Ярмет Ярметовди ккудубшу йисан ужудар хъуркьувалар улупу 20-лан зина мялимар (хъа дурарин арайиъ директорар, бицIидарин багъарин заведующйир айи) райондин администрацияйин, образованиейин отделин, РД-йин образованиейинна илимдин ва РФ-дин мярифтнан министерствйирин чухсагъул мялум апIбан кагъзариинди, гьюрматнан грамотйириинди ва «Урусатдин Федерацияйин образованиейин лайикьлу гъуллугъчи», «РД-йин лайикьлу мялим» удостоверенйир тувбиинди лишанлу гъапIну.