Мейлан Нежефов
Гьавйир бегьемди чвлихъна, аьхъюшнарихъна илтIикIайиз, Хив райондин кIулиъ айи Ярмет Ярметовдин къарарниинди, гьаму йигъари муниципалитетдиъ аьхю субботник кIули гъубшнийи.

Марццишин апIбан бадали гьарсаб гъулан администрацияйин, культурайин хуларин, библиотекйирин гъуллугъчйири, бицIидарин багъарин тербиячйири, мектебарин мялимари ва урхурайидари субботникдиъ ужуб иштирак’вал улупнийи.

КIули гъубшу субботникдин гьякьнаан чан фикрар «Табасаран нурар» газатдиз ачухъ апIуб ккун апIури, узу райондин ветеранарин ва агъсакъларин Советдин председатель Тажудин Мурадхановдихьна илтIикIнийза.

«Сабпи нубатнаъ, райондин глава Ярмет Алиметович кIулиъ ади, субботникдик чпин хусуси пай киву иштиракчйириз чухсагъул мялум апIуз ккундузуз. Аьдатнаъ абхънайиганси, нубатнан ражарира гъуларизди учIвру гурар, булагъар, идарйирин гьяятар, гъирагъ-бужагъар, гъалибвалин паркар ва гюмбтар зирзибилихьан марцц дапIну, рас апIбан, гьяк ва шир йивбан ляхнар кIули гъухну. Аферин! Ккун апIураза райондин агьалйирикан ули-ккна дубхнайи марццишнан утканвал гьамци уьмаратси уьбхюб.

Аьзиз вуйи абйир-бабар, чвйир-чйир! Ухькан гьарури сумчир-салам апIбан кьяляхъ чан зирзибилин эйсивал апIури, марццишин уьбхюз чарйир агури, улупнайи йишвахьна му чIюрх-чIувал гъабхури, цIа йивну, убгуз шлуб убгури, миди вуйиб саб лазимди дару, уликкна ва хиларигъна дяргъру йи-швахь адабтIну ичI, душваъ абхьну, зaълан булди руг алабхьну саламат гъапIиш, фукьан вушра ужи хьибди ва аргъаж шулайи наслариз мидкан дарс шиди. Гьяйифки, жара йишвариъси дарди, ухьухь му ляхин зяифди ву. Лап зяифди. Ва гьаруриз чан гьяятдиан зирзибил адабгъхъантина, думу наанди гъубхнушра, дидкан фу гъапIнушра, гьич саб жизбикьан вижна ктархьуз. Му ихь дюз вуйинхъа?! Хъа табиаьтра ихьуб дарин? Гьадму табиаьтдиъ адарин ихь мал-къара? Гьадлин дарин ухьу хурайи йимиш-мейва? Гъачай вари саб хилди, сар-сарихьна вуйи хатир-гьюрматнан, манишнан ва марццишнан ялав уьбхру гъаразнаъ шулхьа!» – ккун апIура РД-йин лайикьлу мялим Тажудин Мурадхановди райондин агьалйирикан.