Мейлан Нежефов
Цци Ватандин Аьхю дявдиъ гъадабгъу Гъалибвалин машквар 80-пи ражари къайд апIури, мидланра савайи, гъябгъюрайи йис Ватан уьбхрурин йисси тяйин дапIнайивалра гьисабназ гъадабгъури, саки вари Урусатдиъ улихьна дивнайи ядиграрин расвалин ляхнар кIули гъухну ва саб жерге гъулариъ цIийи ядигарарра тикмиш гъапIну. Гьадрарин арайиъ Хив райондин ГъуштIларин гъулра а.
КIваинди уьрхбан ядигар абццуз райондиан гьякимар, гъунши гъулариан хусуси метлеб айи дявдин операцияйиъ баяр талаф духьну дердну кабаб дапIнайи абйир-бабар гъафнийи. Хъа гъирагъдилан дуфнайи хяларин арайиъ Дагъустан Республикайин Халкьдин Собраниейиъ РД-йин Главайин вари ихтиярар айи вакил Нюсрет Уьмаров, РД-йин Халкьдин Собраниейин депутат Алавудин Мирзабалаев, Дагъустан Республикайин Правительствойин Хабаровский крайдиъ айи вакил Бейдулагь Исаев, Дагъ. Огни шагьрин глава Замир Гьяжимурадов, Табасаран райондин глава Мягьямед Къурбанов айи.
Ватанпервервалин серенжемдиъ мектебдиъ урхурайи баяр-шубари лап тясирлуди ва жандилан зиз гъябгъруси шиърар гъурхнийи, дявдикан вуйи саб поэмайин чIукIра сягьнайиин дивнийи. РД-йин лайикьлу артистар Марьям Къазиевайи, Аьбдуллагь Мирзакеримовди ва табасаран халкьдин сягьнайин бажаранлу артистар Чювккерин Ризванди ва Адият Гьямзаевайи ватанпервервалин мяълийир гъапIнийи.
Багъри гъулан тарихнаъ убчIврайи му важиблу йигъкан чан фикрар ачухъ апIуб ккун апIури, узу райондин Жямяаьтлугъ палатайин кIулиъ айи Айдабег Мазовдихьна илтIикIнийза.
«ГъуштIларин гъулан ругариин му ядигар тикмиш апIбаз гьамусяаьт Урусатди Украинайиъ гъабхурайи хусуси метлеб айи дявдин операцияйиъ жюрэтлувал улупурайи ич гъулан баяри ва дурарин юлдшари аьхю кюмек тувну. Ядигар гьязур апIуз теклифра дурарин терефнаан гъабхьиб вуйи. Сифте узуз зенг дапIну, чпин ниятнакан ктибтнийи. Хъа узу вари гъуландариз ва райондин гьякимариз хабар тувнийза. ЧIат айи баярин ният кIулиз адабгъуз чпихьан шлуси гафнииндира, ляхнииндира, кепкерииндира кюмек туву ихь ватанперверариз аферин. Ядигар гъулан кьялаъ, Культурайин хулан улихь абццну. Дидин асас метлеб аргъаж шулайи наслариз ихь жилариин Ватан, Руг, Халкь бадали гъахьикьан гъизгъин дявйириъ гьунарар улупури, жандиъ дагълу ифи либхурайи ихь ата-бабйирин жергйириъди, ихь багъри гъул’ан вуйи ва гъати женгариъ талаф гъахьи эскрар кIваин апIуб ва фикриъ уьрхюб ву. Мармардашдин гъванариъ дурарин ччвурар улупна. Ядигари, ихь арайиъ дирбаш абйир-чвйирин насларин жергйириъ игитар айиб шагьидвал апIура. Гъит дурариз азадвалин ислягь уьмур кьисмат ибшри», – гъапнийи жямяаьтлугъ касди.
