Мейлан Нежефов
Цци Ватандин Аьхю дяви ккудубкIну, 79 йис тамам шулашра, диди инсанарин юкIвариъ гъиту зийнар гьелелиг ккядярхъюрадар. Къурхулу йисари фронтдиъ жандикан ифи кадапIну, душмандиин гъалиб хьпак чпин пай киву кьягьял абйириз, адашариз, чвйириз гъи дурарин баярин, хутларин, багахьлуйирин ва гъуландарин жягьтлувалиинди, дявдин иштиракчйир яшамиш шули гъахьи хулариъ мармардашдин гъванар итуб, гъулариъ ядиграр дивуб, мягьлийириз ва мектебариз ччвурар тувуб ихь уьлкейиъ аьдатнаъ абхъна.
Улихьна йигъари Хив райондин АрхътIарин гъулаъ гьадму гъулан агьали Альберт Эмирагъаевдин дакьатарихъ Ватандин Аьхю дявдиъ талаф гъахьи совет эскрариз бахш дапIнайи кIваин уьрхбан аьхю комплекс абццну. Душваъ Сталиндиз вуйи ядигар, дявдин вахтнаъ ишлетмиш апIури гъахьи яракьарин макетар, аьхю гъвандин дестег дивна.
Шадвалин мяракайиз гьадму йигъари республикайиъ айи ОДКБ-йин делегацияра гъафнийи. Казахстан, Беларусь, Армения, Кыргызстан ва Таджикистан гьюкуматарин вакиларикан ибарат вуйи делегация Хив район ккебгърайи йишв’ин али тагъдикк уьлна кьил, хулан гьялва хьади, далдабу-зурнайиинди, райондин глава кIулиъ ади, табасаран ва лезги халкьарин ялхъвнар-мяълийириинди кьабул гъапIнийи. Гьюрматлу хяларин дахилнаъ республикайин меркездиан дуфнайи вице-премьер, генерал-майор Рамазан Жяфаров, РД-йин Халкьдин Собраниейиъ Дагъустандин Главайин вари ихтиярар айи вакил Нюсрет Уьмаров, Урусатдин Игит, РД-йин ХатIасузвалин советдин секретарь Мягьямед Баачилов, Урусатдин Игит, генерал-полковник Рустам Мурадов, милицияйин подполковник Загьид Загьидов, РД-йин военный комиссар Дайтбег Мустафаев, Табасаран, Агъул, СтIал-Сулейман ва жара гъунши районарин главйир, хъа гьацира машгьур писатель, прозаик, журналист, Урусатдин писателарин Союздин член, жямяаьтлугъ кас, «Закур» газатдин кIулин редактор Александр Проханов ра айи.
Хялар АрхъитIна гъяйиз, дурариз райондин агьалйир ва мектебариъ урхурайидар Ватандин Аьхю дявдин иштиракчйирин ва СВО-йиъ талаф гъахьи игитарин суратар хьади, вари сабхилди ккилигурайи.
Серенжем Урусатдин ва Дагъустандин гимнар тамам апIбиинди абццнийи. Сифте гаф, райондин жилариина дуфнайи хялариз чухсагъул мялум апIури, райондин глава Ярмет Ярметовди гъапнийи. «Гъи райондиз чпин ляхнар-карар гъитну дуфнайи гьюрматлу хялариз аферин. Ихтияр чавай узуз йиз улхбаъ райондин агьалйирин терефнаан сабсан ядигар райондин жилариин тикмиш апIбаз бакар гъахьи меценат Альберт Эмирагъаевдиз, дявдин техникайин кюмек туву генерал-майор Арсен Рягьмановдиз ва гафнииндира, ляхнииндира кюмек гъапIу ватандашариз баракаллагь пуз. Му жюрейин серенжемар гъи ухьуз кьадарсуз лазим ву, фицики гъаних душмни аргъаж шулайи наслариз дюз дару ва кучIлин гафар кIури, дявдин ядиграр пуч апIури – саб гафниинди ихь тарих жараси ккитIибкуз чарйир агурайиган, дурариин гъалиб хьуз ва дюзвал китабариъ ва тарихдиъ гъибтбан бадали, ухьу хилар хъиржвну, зегьмет дизигну ккунду. Гьюрматлу дустар, гъи ихь ватанпервер баяри Украинайин жилариин гъабхурайи хусуси метлеб айи дявдин операцияйиъ улупурайи гъунарар рякъюрахьуз. Дурари абйирин ирс ва тарих намусниинди уьбхюрайибдиин умудлу вухьа. Нубатнан ражарира гъалибвал ихьуб шлувалихъ кIваантIан хъугърахьа. Жараси хьуз мумкинра дар», – гъапнийи райондин кIулиъ айири.
Дугъан кьяляхъ удучIвну гъулхдари ачмиш апIурайи ядигари, Ватандин Аьхю дявдин ва гьамус гъябгъюрайи хусуси метлеб айи дявдин операцияйин игитари улупурайи жюрэтлували вахт ва девир сатIи апIурайиваликан кьатI’иди ва мяналуди ктибтнийи.
Меценат Альберт Эмирагъаев РД-йин Правительствойин терефнаан гьюрматнан кагъзиинди, Урусатдин миноборонайин «За укрепление боевого сотрудничества» медалиинди ва Беларусь, Казахстан республикйирин наградйириинди лишанлу гъапIнийи.
Гьацира, чпин пишекарвалин ляхниъ гъабхурайи баркаллу зегьметназ лигну, ОДКБ-йин ва Урусатдин оборонайин министерствойин гьюрматнан наградйириз Рамазан Жяфаровдиз, Эфенди Велимурадовдиз, Ариф Бугатиловдиз, Ярмет Ярметовдиз ва Арсен Рамазановдиз тувнийи.
Серенжем ядигарихъ кюкйир дивбиинди, баяр-шубари, артистари мяълийир ва шиърар урхбиинди аьхирихъна гъафнийи.
