Мейлан Нежефов

Улихьна йигъари СтIал Сулейман райондин Даркуш гъулан главайин пешкешариз вуйи юкьяр дисбаан талитар кIули гъухнийи. Талитариъ Хив райондин ДЮСШ-диъ урхурайидар иштирак гъахьнийи. Дилин баяри райондиз саб гъалибвалин ва хьуб пешкешнан йишвар гъазанмиш гъапIну.

Райондин ОМВД-йин гъарашугъари гъуларин администрацйириъ, мектебариъ, культурайин хулариъ, ФАП-ариъ, почтайин отделенйириъ ва бицIидарин багъариъ лихурайи коллективарихъди «Интернет-лутивал» темайиан презентацияра хъади жюрбежюр сюгьбатар кIули гъахура. КIваин апIуз ккундучуз, банкариан вуча кIури, зенгар апIурайи тIафлари райондин швнурсар агьалийиз акъа иливну.

CВО-йиан жикъи вахтназ отпускдиз дуфнайи эскрарихъди гюрюшмиш хьуб райондиъ аьдатнаъ абхъна. Гьаци, Мажвгларин кьялан мектебдиъ капитан Насир Наврузовдихъди аьхю классариъ урхурайидар гюрюшмиш гъахьнийи. Дугъу урхурайидариз дявдин женгариъ ихь кьягьялари улупурайи гьунарарикан ктибтнийи. Офицерин гафариинди, гьунарар улупуз эскрариз багъри ругарилан гъюрайи гуманитарный гъагъари ва урхурайидарин кагъзари юкIв капIра.

Райондин глава Ярмет Ярметов ГъуштIил гъулан агьали Сяид Жалиловдихъди гюрюшмиш гъахьну. Хуш-беш апIбалан кьяляхъ, Ярмет Ярметовди, игит администрацияйин терефнаан вуйи гьюрматнан кагъзиинди лишанлу гъапIну.

Райондин спортивный комплексдиъ ерлешмиш дубхьнайи «Сарпидарин гьяракат» кабинетдиъ гергми стол кIули гъубшну. Серенжем гъябгъюрайи вахтна 14 йис тамам гъабхьи живанариз райондин главайи ва «Берекет-Ф» тешкилатдин директор Зарета Фятялиевайи паспортар тувну.