Хусуси метлеб айи дявдин операцияйин иштиракчйир саб-швнуб вазлилан улар чпиз ккилигури ктIурччвурайи ва гъамлу дердери кабаб дапIнайи багъридарихьна йицIихьуд-къад йигъандин вахтназ вуйи отпускдиз гъулариз гъюра. Хив райондин гъуларин ва мектебарин администрацйири, дурар аьхю гьюрматниинди кьабул апIури, эскрарихъди гюрюшар гъахуб аьдатнаъ ипна.
Улихьна йигъари Хив райондин глава Ярмет Ярметовдин жягьтлувалиинди райондиз дуфнайи кьягьяларихъди гюрюш тешкил гъапIнийи. Думу серенжемдиъ ЦIинитI гъул’ан вуйи Славик Шагьмарданов, ЦIийи Фрюгъярин гъулан агьали Эдик Аюбов, Мажвглан вуйи Славик Ибрагьимов ва дурарин багахьлуйир иштирак гъахьнийи.
Эскрарихъди гъабхьи сюгьбатнаъ главайи миллетчйирихъди гъахурайи женгариъ гьунарар улупурайи ватанагьлийириз гьаруриз жа-жаради аферин гъапнийи.
«Учвустар игитарихъди шулайи гюрюшарин, сюгьбатарин кьяляхъ ихь халкьдин дамагъ апIувал айибтIан артухъ шулу. Баракаллагь учвуз! Фукьан дарвалар кашра, аьзиятар алахьурашра, дурарикан аьрза адарди, багъридариз ашкар дарапIри, жюрэтлуди женг гъабхурачва. Дюзвалин ва гьякьвалин шилнаъди гъалибвал багахь хьпак учву киврайи лайикьлу пайнак гьич саринра шаклувал адар. Учву намуслувалиинди ихь ата-бабйирин ватанпервервалин шил уьбхюрайивал му учвуз марцци тербия туву абйир-бабаринси, багъри ругаринра, ихь республикайинра заанвал ву. ИкибаштIан, му аргъаж шулайи наслариз кьягьялвалин дарсра ву», – гъапнийи чан улхбаъ райондин кIулиъ айири.
Эскрарира Ярмет Ярметовдиз, чпин хизан-кюлфетариз райондин администрацияйин ва миди вуйи гьякимарин терефнаанра гъюрайи кюмекназ, алахьурайи месэлйир дидричди гьял апIурайивализ – саб гафниинди, чпихьна айи гьякь-гьюрматназ ва манишнан ялвиз чухсагъул гъапнийи. Дурари райондин главайикан чпин хизанарин хусуси тIалабар ва чпин гъуларин жямяаьтдин рякъюн, штун ва жара гьял дапIну ккуни меселйир ашкар гъапIнийи.
Гюрюш давам апIури, кьягьялари райондин агьалйирин терефнаан чпихьна вуйи фикир дурари хътапIурайи гуманитарный гъагъниинди, мектебариъ урхурайи чвйир-чйирин закурин йигъ акуб хьпак миж кади дикIурайи мани кагъзариинди гьисс апIурайиваликанра ктибтнийи.
«Дугъриданра, жвувахъди душваъ миллетчирихъди женгариъ айи баярик багъри ругарилан гъюрайи гуманитарный гъагъари ва мектебариъ урхурайи малайикарин кагъзари аьхю гьевес капIра. Гьарсаб кагъзиъ айи назук гьендемариинди ва мани келимйиринди дидикIнайи фагьмар-фикрари жандин гьавйир ва гевюл ачухъ апIури, хлинццар киврачук. Учу багахьлуйирихъдира аьлакьайиз удучIвури шулуча. Саб гафниинди, гьаци гьаканди жвуву жан фида апIурайивал гъюдубчвIури адруб дурарин кагъзариан ва аьхюдарин кюмекнаанра субут шули ачуз. Мициб сабвал айивалиан нубатнан ражарира гъалибвал ихь терефнаъ хьибди», – гъапнийи Славик Ибрагьимовди.
Аьхириъ, хусуси мяна айи дявдин операцияйин иштиракчйири, отпуск ккудубкIубси, чпи яракьдин ярар-дустарихьна кьяляхъ гъягърубдикан мялумат тувнийи.
Гюрюшдин гьякьнаан чан фикрар узуз Славикдин дада Наида Ибрагьимовайира ачухъ гъапIнийи.
«Ав, райондин кIулиъ айири чан мажал адру графикдиан баярихъди гюрюшмиш хьуз мумкинвал гъабгну. Мициб мюгьлет абгуб дугъан терефнаан баярихьна аьхю гьюрмат айивал ву. Хусуси метлеб айи дявдин операцияйиъ гъи йиз кьюр велед иштирак шулайиз. Гъит вари баяриз хаин душмниин гъалиб хьуз мюгькам сагъ’вал ва кьувват туври. Улихьна йигъари Радикдиз зиян гъабхьнийиз. Гьамусяаьт думу Ростовдиъ аьзарханайиъ а. Духтрарикан дугъан сагъламвалин гъаразнаъ хьуб ккун гъапIнийча. Мидланра савайи, гъулаъ ич хусуси аьхю хутIил айич. Лап ухдихъанмина гьадушв’ин хулар дивуз Славикдин аьхю метлеб ву. Гъи дугъаз шубур велед а. Гьаму суаларин гьякьнаан лазим вуйи кагъзариз кюмек хьуб главайиканра ккун гъапIнийча. Гъулариъ жигьилар гъузуб, дурариинди гъулан асул ва бина давам апIуб гъи ихь абйир-бабарин асас буржйирикан саб ву. Главайи чав гъапиганси, кюмекназ чав ва ляхин али имбу гьякимар бакар шул кIури, умуд кивраза» – къайд гъапIнийи Наида Ибрягьимовайи.
