Наргиз Гюлечова
29-пи ноябриъ Мягьячгъалайин В.И. Лениндин ччвурнахъ хъайи кьялан майдандиин Гъулан мяишатдин пишекрин Йигъ лап заан дережайиъди къайд гъапIну. Му йигъахъди аьлакьалу вуди, республикайиъ гьясил апIурайи гъулан мяишатдин сурсатарин ярмаркара кIули гъубшну.
Ярмаркайиъ Дагъустандин 22 муниципалитетари, чпин районариъ гьясил апIурайи сурсатарихъди ва халкьдин хурагарихъди ккабалгнайи майднар гьязур дапIнайи. Ярмаркайиз, инсанариз улупбан бадали, 50 кIултIан артухъ жинснан йицар, марччарна цIигьар, гьяйвнар, пеэр-даттар, гамшар духнайи. Мидланра гъайри, республикайин гъулан мяишатдин 22 аьхю карханайи чпи гьясил апIурайи сурсатарра муштарйирин улихьна адагънайи.
Гъулан мяишатдин зегьметкешариз бахш вуди тешкил дапIнайи му серенжемдиъ Дагъустан Республикайин Глава Сергей Меликов, Правительствойин председатель Аьбдулмуслим Аьдулмуслимов, Дагъустандин Халкьдин Собраниейин председатель Заур Аскендеров, региондин министрар ва хайлин жара касарра иштирак гъахьну.
«Дагъустан республикайин федералин гъулан мяишатдин илимдин центр» ФГБНУ-йин алимари чпин хъуркьувалар Сергей Меликовдиз улупну. Думу центрин кIулиъ айи Нариман Ниматуллаевди республикайин главайиз чпи апIурайи ляхникан ктибтури, марччарин цIийи жинс (артлухский меринос) адабгъубдикан ва зат имдарди дудубгнайи дюгдин сорт цIийи алапIбакан мялум гъапIну.
Къайд апIуб лазим вуки, Гъулан мяишатдин пишекрин йигъахъди аьлакьалу вуди тешкил дапIнайи ярмаркайиъ иштирак духьнайи гьюрматлу хялариз, республикайин гъулан мяишатдин цирклариъ уьмриз кечирмиш апIурайи 14 инвестицйирин проектарин презентацияра гъапIну.
Ярмаркайиъ иштирак шулайи республикайин гъулан мяишатдин карханйирин терефнаан кьюб аьхю «КаМАЗ» машинариъди 26 тонна гъулан мяишатдин сурсатарикан ибарат вуйи гуманитарный гъагъ, Украинайин аьтрафариин гъябгъюрайи хусуси метлеб айи дявдин операцияйиъ иштирак шулайи ихь эскрариз гьапIну ва 130 ипIру-убхъру сурсатар айи гъварчар хусуси метлеб айи дявдин операцияйиъ эскрар кечмиш гъахьи хизанариз тувну. Республикайин мяишатдин ва ипIру-убхъру сурсатарин министерствойин ва Дагъустандин ярквран мяишатдин комитетдин пишекрарин кюмекниинди гьарсаб хизандихьна думу паяр гъурукьну.
Мидланра гъайри, ярмаркайиз дуфнайи касариз Къизларин дюгдин аш ва Дагъустандин дагълариъ уч гъапIу укIарикан вуйи ицциб тIяаьмнан убцру чайра тувну.
Ярмаркайин дахилнаъди республикайин главайи цирклиъ ужудар хъуркьувалар улупу карханйир ва гъулан мяишатдин пишекрар правительствойин пешкешариинди лишанлу гъапIну. Серенжем муниципалитетарин культурайин управленйирин коллективари тешкил дапIнайи концертдин программайиинди аьхирихъна гъафну.
