Зубайдат Шябанова

Табасаран райондин глава Мягьямед Къурбановди ЦIийи йис улубкьурайи йигъари, вари Урусатдиъ гьяракатнаъ ипнайи «БицIидарин кIван хиялар тамам апIру ёлка» рягьимлувалин акцияйиз кьувват вуди, гьациб ёлка райондин администрацияйиъра дивну. Дугъу сарпирди думу ёлкайикан бицIидари чпин кьастар дидикIнайи кьюб гиргилагъаж ктагъну. Дурариъ Мягьрягъ гъул’ан вуйи кьюр чвуччву, Рягьимди ва Амири, чпиз ккуни пешкешарикан дибикIну кагъаз ивнайи. ЦIийи йисандин гъаншариъ чвйирихьна пешкешар гърукьну.

«ЦIийи йисандин лишан вуйи ёлкайик китIнайи жюрбежюр рангарин гиргилагъажариъ бицIидари чпин кIваъ айи хиялар дидикIна. Ухьхьан, аьхюдарихьан, дурарин кIваъ айи хиялар тамам апIуз шулхьухьан. Узу уьмрин гъагъи аьгьвалатнаъ ахънайи бицIидариз кюмекнан хил гьачIабккурайидарин жергейиъ аьхю хушнинди учIвраза», – къайд гъапIну Мягьямед Къурбановди.
Акцияйин дахилнаъди главайи Запорожский областдин Михайловский райондин шубур бицIирин кIван хиялар тамам гъапIну. Магьа гьаци дугъу ЦIийи йисандин машквран серенжемариъ хьур бицIир рази гъапIну.

Райондин агьалйир улубкьурайи ЦIийи йисахъди тебрик апIури, Мягьямед Къурбановди къайд гъапIганси, «КIван хиялар тамам апIру ёлка» 2018-пи йисан Урусатдин Президент Владимир Путинди гьяракатнаъ ипу ужуб ва рягьимлу аьдат ву. Думу аьдатнаъ убчIву акцияйи уьмрин гъагъи аьгьвалатнаъ ахъу бицIидарин кIван марцци хиялар тамам апIбаъ вари уьлкейин агьалйир сатIи хьуз гъитра.
Акцияйиъ Табасаран райондин администрацияйин вари гъуллугъчйир, поселенйирин главйир, жюрбежюр идарйирин ва карханйирин кIулиъ айидар иштирак гъахьну.