Зубайдат Шябанова
Гьаму йигъари Табасаран райондин Жулжагъ гъулаъ Хизандин, мюгьюббатнан ва вафалувалин йигъаз тялукь вуйи шадлугънан мажлис кIули гъубшну. Думу серенжемдиъ райондин глава Мягьямед Къурбанов, райондин КЦСОН-дин кIулиъ айи Тимур Аьлиев, хайлин гъуларин главйир, Жулжагъ ва Гурихъ гъуларин агьалйир, СВО-йин иштиракчйирин хизанар, гизаф бицIидар айи абйир-бабар ва гизаф йисари сатIиди яшамиш шулайи хизанарин яшлу вакилар иштирак гъахьну.
Уч духьнайидар Мягьямед Къурбановди РД-йин Глава Сергей Меликовдин ччвурнахъан машкврахъди тебрик гъапIну.
Муниципалитетдин кIулиъ айири шадлугънан серенжемариъ 50 йистIан артухъ сар-сарихъди албагну яшамиш шулайи хизанариз, 8-12 велед тербияламиш гъапIу абйир-бабариз, хизандин аьдатар ва багьалу ирс уьбхбак баркаллу пай кивдариз чухсагъулин кагъзар тувну.
Серенжем райондин культурайин управлениейин артистари, гьацира Жулжагъ гъулан бицIидарин багъдин баяр-шубари ва мектебдиъ урхурайидари гьязур дапIнайи концертдин программайиинди давам гъабхьнийи.
Серенжемдин кьяляхъ узу Жулжагъ гъулан администрацияйин глава Шагьимерден Гьясанаваевдихъди сюгьбат гъубхнийза. Дугъу къайд гъапIганси, Жулжагъ гъулан поселениейин дахилнаъ 7 гъул а. Гьадму вари гъулариан гьамусяаьт хусуси метлеб айи операцияйиъ 75 кас иштирак шула. Гьяйифки, серенжемдиз вари хизанарин вакилариз теклиф апIуз мумкинвал гъабхьундар.
«Гьаму серенжем учу ич поселениейи ва Гурихъ гъулан сельсоветди сатIиди тешкил гъапIнийча. Серенжемдиъ ич сельсоветдин дахилнаъ айи гъулариан 50 ва артухъ йисари сатIиди албагну яшамиш шулайи ва 8-12 велед тербияламиш гъапIу аьхю хизанарин 13 эйсийиз ва Гурихъ поселениейин администрацияйин дахилнаъ айи гъулариан 10 хизандин вакилариз теклиф гъапIунча. Учу теклиф дапIнайи хизанарин арайиъ хусуси метлеб айи операцияйин эскрарин абйир-бабарра айи. Дурар Жулжагъ гъул’ан Сулейман ва Селем Рамазановарин, Гьесихъ гъул’ан Аьгьмедоварин, Яргулигъ гъул’ан вуйи Ашаханум Рамазановайин, Гурихъ поселениейин администрацияйин дахилнаъ айи Гисихъ гъул’ан Гьяшимоварин хизанар ву.
Пуз ккундузузки, уч духьнайидар вари чпиз фикир тувбаз марцци кIваантIан шад гъахьну. Теклиф гъапIдарилан гъайри серенжемдиз гъулан агъсакълар, жигьилар, мектебдиъ урхурайидар гъафну. Гьаму жюрейин серенжемар ихь наслиз гьякь-гьюрмат уьбхбан ужуб дарс ву», – гъапнийи Шагьимерден Гьясанаваевди.
Гьадму йигъан Дагъустандин глава Сергей Меликовдира СВО-йин иштиракчйирин абйир-бабариз, 25-йисан ва артухъ сатIиди албагну яшамиш гъахьи республикайин 7 хизандин эйсйириз чахьна теклиф гъапIну. Дурарин арайиъ ватанпервервалин гьиссариинди чпин веледар тербияламиш гъапIу Табасаран райондин ТIивак гъул’ан вуйи Аьбдулгьямид ва Гюлгес Халикьоварра айи.
Халикьоварин вари хьубред баярра хусуси метлеб айи дявдин операцияйин гьяракатар ккергъхъанмина гьадушваъ а. Сар бай, гьяйиф, игитси кечмиш гъахьну.
«Кюгьне аьсрарианмина инсандин хасиятнаъ, уьмриз лигувалиъ хизанди важиблу ва асас роль уйнамиш апIура. Гьарсар касди Ватандихьна вуйи ккунивал, дидхъан жавабдарвал, зегьметнахьна аьшкь, багъри тарихдихьна ва уьмрихьна вуйи тажруба иллагьки абайин хулаъ гъадабгъуру.
Уьлкейиз читин вахтна хайлин хизанариъ, гьадму гьисабнаъ ичв, баяр, гъардшар, жилар хусуси метлеб айи дявдин операцияйин иштиракчйир гъахьну. Ухьу игит ватандашариинди дамагълу вухьа. Дурари гъабхурайи гъуллугъназ чухсагъул, хъа учвуз – далу тереф вафалуди уьбхбаз ва ихь уьмуми гъалибвал багахь апIбак киврайи пайназ баркаллагь», – гъапну республикайин главайи Халикьоварин хизандиз, гьюкуматдин терефнаан Чухсагъулин кагъаз туври.
КIваин апIуз ккундучуз, Халикьоварин хьур балкан Шябан шубурпи бай вуйи. Хусуси метлеб айи операцияйиъ нацистарихьан Новороссия азад апIбан женгариъ думу игитси кечмиш гъахьну. Кечмиш хьпан кьяляхъ Урусатдин Президентдин къарарниинди Шябан Халикьов Кьягьялвалин ордендиинди лишанлу гъапIну.
«Узуз хьур бай айзуз. Дурар вари военный гъуллугънаъ айи. Хусуси метлеб айи операция ккебгъган, вари баяр Ватандин маракьар уьрхюз гъушну. Гьяйифки, сар велед кечмиш гъахьнийич. Думу кивну кьюб гьяфтайилан дугъаз риш гъахьну. Худлиин бабан ччвур иливунча», – ктибтнийи Аьбдулгьямид Халикьовди.
Гъябгъюрайи Хизандин йис вари хизанариз шадвал, бахт, разивал ва саламатвал артухъ айиб, хъа бедбахтвалин чIуру хабрар затра адруб ибшри. Ихь баяр сагъ-саламатди хулариз дуфну, вари хизанариъ мюгьюббатна вафалувал артухъ ибшри.
