Гюльнара Мягьямедова
Гьар йисан июндин шубубпи элгьет йигъан Урусатдиъ медицинайин гъуллугъчйирин йигъ къайд апIура. 2024-пи йисан машквран йигъ 16-пи июндиин алабхъура.
Думу йигъ, инсанарин уьмрар ва сагъламвал уьбхру лизи халатар хъайи инсанариси, анализар апIру лаборантари, медицинайин цIийи оборудование адабгъру, рас апIру инженерари, биологари, медицинайин вузариъ, колледжариъ урхурайи студентари къайд апIуру.
Пишекарвалин машквар 1980-пи йисан 1-пи октябриъ СССР-ин Верховный Советдин Президиумдин указдиинди тяйин гъапIуб ву. Гьаддихъанмина гьарйисан думу машквар къайд апIури, гьамус саки 45 йис ву.
Уьлкейин агьалйирин сагъламвал уьбхбан цирклиъ варитIан заан ччвур «Урусатдин Федерацияйин лайикьлу духтир» ву. Думу ччвур инсандин уьзур аьгъю апIбаъ цIийи методика улупдариз, чIуру уьзрар сагъ апIбаъ хъуркьувалар гъадагъдариз, 20 йисантIан артухъ медицинайин цирклиъ гъилихдариз ва гьюкуматдин наградйир айидариз тувру.
Саризра жиниб дар, медицинайин гъуллугъчйири инсанарин сагъламвал уьбхюра, гизаф дюшюшариъ аьжаликкан ккадагъура. Медицинайин гъуллугъчйири ихь уьмриъ фициб роль уйнамиш апIураш, 2020-пи йисан коронавирусдин уьзур гъафиган аьгъю гъабхьнийи. Думуган гизаф духтрари уьзрихъди женгнаъ чпин жанар дивнийи.
Гъира медицинайин хайлин пишекрар ихь уьлкейин маракьар уьрхюри, СВО-йин женгариъ айи эскрариз, думу терефариъ яшамиш шулайи ислягь агьалйириз медицинайин кюмек туври лихура. Женгар гъуху йишвариин зийнар духьнайи эскрариз медицинайин сабпи кюмек туврайи духтрар ва чюлиъ ерлемиш дапIнайи саб жюрейин шартIар адру модулариъ лихурайи хирургар миллетчйирин терефнаан гъюрайи заваликк кми-кмиди ккахьра. Редакцияйиз гъафи, учу сюгьбатар гъуху СВО-йин иштиракчи эскрари медицинайин гъуллугъчйирикан гьамци кIури шулу: «Духтрар, хлинццар ктаршра, лазим вуйиган вахтниинди кюмек хьади хъуркьра. Дурар инсандин уьмур уьбхюрайи малаикар ву».
СВО-йин зонайиъ лихурайи духтрарин ва медицинайин кьялан пишекрарин арайиъ ихь ватанагьлийирра а.
Редакцияйин коллективдин терефнаан ихь духтрар, медицинайин пишейин кьялан гъуллугъчйир, инсандин сагъламвалин цирклик пай киврайидар вари пишекарвалин машкврахъди тебрик апIури, дурариз жандин сагъ’вал, ляхниъ хъуркьувалар ккун апIурача.
