Наргиз Гюлечова

5-пи июнди Урусатдин Кафари меркездиъ Варихалкьарин экономикайин форумди чан ляхин ккебгъну.

Му форум тешкил апIури цци 27-пи раж ву. Урусатдиин гизаф гьюкуматари санкцйир иливнашра, ПМЭФ-диъ иштирак хьпан бадали, Санкт-Петербургдиз чпин теклифар ва проектар хьади, 139 гьюкуматдиан 19 агъзур иштиракчйир дуфна. Форумдиъ Дагъустан Республикайира стенд гьязур дапIна. Дина республикайин Правительствойин председатель Аьбдулмуслим Аьбдулмуслимовра кIулиъ ади, саб аьхю делегация дубшна.

Цци форумдин асас тема – «Сабсдар мумкинвалар айи гьюкуматарин артмиш’вализ кюмек тувру цIийи центрар арайиз хуб» ву. Гьарганси ццира, форумдин асас гьядиса Урусатдин Президент Владимир Путин иштирак шулайи пленарный заседание ву.

Форумдин дахилнаъди Аьбдулмуслим Аьбдулмуслимовди «Юнигрин Энерджи» ГК-йин генеральный директор Игорь Шахрайдихъди 2025-пи йисан Нугъай райондиъ 60 МВт кьувватнан ригъдин электростанцияйин тикилишчивалин ва гьадму инвестицйирин проект уьмриз кечирмиш апIбан месэлйирикан гъулхну. Му проект юрутмиш апIбаз, жара дапIнайи инвестицйирин кьадар 5,3 миллиард манат ву, ва душваъ гьаргандиз вуйи 20 лихру йишварра ачмиш апIиди.
Форумдин кьюбпи йигъан Дагъустандин делегацияйин вакилари халкьарин арайиъ аьлакьйир уьрхюрайи Мовсквайин гьюкуматдин институтдихъди (МГИМО) йикьрар йитIуз ва Казахстандиан вуйи посолихъди гюрюшмиш хьуз планламиш дапIна.

Гьацира думу йигъан информацияйин технологйирин цирклиан вуйи «ГИКИ ХАУС» ООО-йихъди, Сбербанк ПАО-йихъди, Ленинградский областдин правительствойихъди ва РФ-дин гьюлинна нирарин транспортдин федералин агентствойихъди йикьрар йитIувалар планламиш дапIна.