Гюльнара Мягьямедова
27-пи феврали РД-йин мялуматарин ва чап апIбарин Агентствойи 2023-пи йисандин ляхнин натижйир гъивну ва 2024-пи йисаз улихь дивнайи месэлйирикан гъулхну.
Аьхю доклад хьади удучIвну гъулху Агентствойин кIулиъ айи Аьбдуризакь Жамалутдиновди республикайиъ мялуматарин сатIи вуйи гъурулуш арайиз дуфнайиваликан ва думу Урусатдин мялуматарин уртахъ вуйи зонайин саб пай вуйиваликан гъапнийи.
«2022-пи йисан кьюбпи пайнахь тевиган, 2023-пи йисан сабпи 6 вазли Дагъинформдин дахилнаъ айи мялуматарин дакьатарин сайтариан ва телеграм-каналариан агьалйири хабрар гъадагъувал артухъ гъабхьну»,
– гъапнийи Аьбдуризакь Жамалутдиновди.
Совещаниейиъ удучIвну гъулху РД-йин АГИП-дин мялуматарин гъуллугънан ва мялуматарин политикайин управлениейин кIулиъ айи Рашид Акавовди гъапиганси, республикайиз 2023-пи йис гъагъиб гъабхьнушра, махлукьатлу мялуматарин дакьатари чпин улихь дивнайи месэлйир тамам гъапIну. «Бегьем тамам дарапIу месэлйирра имишул, хъа сабишв’инди гъадабгъиш, гьаму зализ уч духьнайи журналистарин ва жара гъуллугъчйирин кюмекниинди хайлин хъуркьуваларра гъазанмиш дапIна», – къайд гъапIнийи дугъу.
РД-йин вице-премьер – РД-йин жиларин ва хусусиятнан ляхнариз лигру министр Заур Эминовдира хусуси метлеб айи дявдин операцияйикан мялуматар, репортажар, СВО-йин иштиракчйирикан документальный фильмйир адагъури, махлукьатлу мялуматарин дакьатарин вакилари дапIнайи зурба ляхниз заан кьимат тувнийи.
Дагъинформдин яркьу коллегияйиъ «Дагъустан» Этномедиахолдингдин» кIулиъ айи Арсен Юсуповди холдингди сад йисандин арайиъ дапIнайи ляхнин натижйир гъивнийи. Дугъу къайд гъапIганси, холдингдиъ журналистариз авторвалин гонорарар тувбиинди маважиб за апIру гъурулуш ляхник кипна. Гьаддиз дилдигну, милли чIалариинди газатариъ лихурайи журналистарин маважиб за гъабхьну.
«Эгер холдинг арайиз гъюруган журналистарин маважибдин кьадар 20-22 агъзур манат вуйиш, гъи холдингдиъ лихурайи гъуллугъчйирин маважибдин кьялан гьисаб 30 агъзур манатдилан зиина удубчIвна. Мидланра савайи, гьаму йисан майдин вазли республикайин правительствойи СМИ-йин гъуллугъчйирин окладар за апIуз гаф тувна»,
– гъапнийи Арсен Юсуповди.
Чан улхбаъ дугъу 2023-пи йисан хъуркьувалиинди гъуху серенжемарикан, дагъустан чIалариинди ляхин апIурайи журналистарин кьадар артухъ апIбан планарикан ктибтнийи.
Улхбан аьхириъ Арсен Юсуповди «Дагъустандин правда» ва «Дагъустандин жигьилар» газатар бюджетдин идаравалиан удучIвну, чпин кIул’инди ляхин апIуз хъюгънайивализ дилигну, РД-йин «Этномедиахолдинг «Дагъустан» ГБУ РД-йин ГАУ-йиз илтIибкIбан месэла ахтармиш апIуваликан гъапнийи.
