Гюльнара Мягьямедова

 

Саб ражари, йиз жигьил вахтна, Урусатдиъ яшамиш шулайи йиз чуччуз, урсари гакIвлин хулар гьаз апIуйкIан, кIури суал тувнийза. Дугъу, хъа чпиз гъванар адруган, кIури жаваб тувнийи. Гъванар-гъарзари абцIнайи Дагъустандиъ яшамиш шулайи узу, наан-вуш гъванартIан гакIвлар гизаф айиваликан затра фикир апIурадайза.

 

Ав, гьар йишваъ инсанари чпин хиликк ккайи материаликан дусуз-гъудужвуз хулар апIуру, гьамус узу дидин гъавриъ аза. Дагъустан гьар жюре гъванарихъди девлетлу ву. Табасаранари чпин кьюб мертебайикан ибарат вуйи хулар гъванарикан апIури, беркет хъайи, мюгькам хулар хьпан бадали, шибритIиъ арсран манатар ирчри гъахьну. Гьелбетда, гьамус гизафдари хулар апIруган, гьязурди айи кирпичар, шлакоблокар, газоблокар ва гьацдар жара материалар ишлетмиш апIуру.

Тикилишчивалин пише кюгьне вахтарихъанмина айиб вушра, тикилишчйирин жергйир аьхиримжи йисари лапра яркьу духьна. Ужур тикилишчийиз гьарган наан вушра ляхин бихъуру. Ужуб ляхнихъ тувру кьиматра заануб ву. Тикилишчивалин ляхниз ужуб уставал кайидарси, шагурдвал апIуз шлу инсанарра лазим ву. Гьаддиз Урусатдин тикилишчивалин цирклиъ 6 миллиондилан зиина инсанари ляхин апIура. Думу цирклин аьхюну пай ляхнар тамам апIурайидар бицIи ва кьялан карханйир ву. Гизафдари чпин бизнес тикилишчивалин цирклилан башламиш апIуру, фицики, сифтейин харжар гизаф дарди, тикилишчивалин ляхин рягьятди гъабхуз шулу.

Гьаму йисан тикилишчийин пишекарвалин машквран йигъ 11-пи августди къайд апIуру. Думу машквар Ватандин Аьхю дяви ккудубкIбан кьяляхъ, уьлкейин вари йишвариъ хулар-йишвар, гьясиллувалин комплексар, рукьан рякъяр, гъядар тикмиш апIурайи вахтна арайиз гъафиб ву. 1955-пи йисан августдин вазлин кьюбпи элгьет йигъан тикилишчйирин пишекарвалин машквар къайд апIбан гьякьнаан СССР-ин Верховный Советдин указ удубчIвнийи. Сабпи ражари ихь уьлкейиъ думу йигъ 1956-пи йисан къайд гъапIнийи, ва гьадму йигъан Москвайиъ «Лужники» стадион абццнийи.

Советарин Союздин девриъ гьар йисан тикилишчйирин йигъаз аьхю ва мяналу дарамат тикмиш дапIну, ишлетмиш’вализ тувуз мумкинвалар агуйи. Тикилишчйири машкврахъди аьлакьалу вуйи митингариъ инсанар яшамиш шлу хулар, мектебар, бицIидарин багъар, яшайишдин жара дараматар вахтназ улихьна ккудукIну, ишлетмиш’вализ тувуз гаф тувуйи.
Тикилишчйирин пишекарвалин машквар фикир тутрувди гъибтуз шлуб дар, фицики табасаранарин арайиъкьан гизаф гъвандин, гакIвлин устйир Дагъустандин жара миллетарин арайиъ адаршул. Газатдин гъюру нумрайиъ ихь ватанагьлийир вуйи гьам жигьил, гьамсана аьхю тажруба айи тикилишчйирихъди вуйи сюгьбатар тувбанди вуча.
Гьюрматлу тикилишчйир! Ичв пишекарвалин машквар кIваантIан тебрик апIури, учвуз жандин мюгькам сагъвал, ляхниъ заан хъуркьувалар ккун апIурача.