Гъийин Урусатдиъ Шишкиндин, Айвазовскийин, Левитандин, Поленовдин ва жара машгьур художникарин табиаьтдин шиклар зигбаан ужударсдар аьдатар давам ап1урайи художникар гизаф а. Дагъустандин табиаьтра шиклариз гъадабгъуз гизаф лайикьлуб ву – республикайин фуну пIипIнахъинди гъушишра, уларикк уткан ягъал дагълар, чру укI айи сивар, укIу нирар, йимишарин багълар, гъалин яркврар ккахьру.
Багъри макандин гюрчегвал искусствойин кюмекниинди уьмурлугъ апIурайидарин арайиъ жигьил табасаран риш, художник Сефижат Керимовара (шиклиъ) а. Думу 1996-пи йисан Дагъустандин Огни шагьриъ бабкан. гъахьну. Шуран адаш, Мирзакерим, Табасаран райондин Гъуярик гъул’ан, хъа дада ТинтIан ву. Сефижатдин 3 йис гъабхьиган, дугъан адаш, милицияйин гъуллугъчи, ляхниан Къумторгъала райондин центр Къурхмасгъалайиз гьаънийи. Гьаддихъанмина Керимоварин хизан гъумугъ халкьдин вакиларин арайиъ яшамиш шула.
– Шубуд йисандин яшарихъанмина 21 йис хьайизкьан узуКъурхмасгъалайиъ гъахьунза. Гъумугъарин чIалра гъудубгъунза. Гъи табасаран чIал’индиси, гъумугъ чIал’индира гафар апIураза», – кIура художникди.
Сефижат хизандиъ кьюрпи велед ву. Дугъаз учвтIан аьхю чи ва бицIи чве а. Шиклар зигбахьна шураз бицIидиганхъанмина аьшкь ади гъабхьну. Му искусствойихьна юкIв зигувал Сефижатдихьна дадайихьан гъафиб ву кIури, хиял вуйиз, фицики Интизар Керимовайи, Избербашдин педагогвалин училище ккудубкIну, Къурхмасгъалайин мектебдиъ шиклар зигбан дарсар кивра. Шуран адаш гьамусяаьт, полицияйиан удучIвну, чан хушниинди хусуси метлеб айи дявдин операцияйиъ иштирак шула.
– Узу му ляхнихъ юкIв хъайир вушра, узук лап яман аьшкь дадайи капIнийзук. Шиклар зигбаан сарпи мялимра дада вуйиз. 9-пи класс ккудубкIбалан кьяляхъ узу, жандин лап бицIир вуйивализ лигну, урхуз гьаундайи. Сад йисансан мектебдиз гъягъюри имийза, хъасин, 2012-пи йисан Мягьячгъалайиъ айи М.А.Джемалин ччвурнахъ хъайи Дагъустандин художествойин училищейик урхуз кучIвнийза. Юкьуд йисандин арайиъ училищейиъ дурхну, 2016-пи йисан, заан образование гъадабгъувал метлеб ади, ДГПУ-йин художествойинна графикайин факультетдик кучIвнийза. Йирхьуд йисан вуздиъра гъурхунза, – ктибтура Сефижат Керимовайи.
Жигьил художникди чав сабпи ражари кау ва варитIан гъагъиди арайиз гъафи чан шиклариканра ктибтнийи. Дугъан гафариинди, художникдиз чав апIурайи ляхин фукьан ужуди аьгъяш, дугъаз уьмрин гьякьикьат шиклиз адабгъуз гьадмукьан гъагъидира алабхъуру. Шикил капIбан саягънан гьякьнаан кIулиъ гизаф фикрар айиган, гьадраригъян саб гъядябгъюз гизаф читинди шулу.
– Гъийин йигъаз узуз шиклиъ атIабгуз варитIан читинди алабхъурайиб инсанарин суратар ва юрушар вузуз, варитIан гизафси капIуз ккуниб – табиаьтдин гюрюнюш. Анжагъ узузтIан хас дару табиаьт капIбан саягъра азуз. Мисал вуди гъадабгъиш, шагьрин рякъбар шиклиъ атIагруган, узу гизаф хулар ва архитектурайин дараматар каъри шулза. Мициб жюрейиинди шиклар зигрудар лап цIибтIан адар. Дюзди кIуруш, шикил зигуз гъагъиди дар. Му ляхниъ алабхъру читинвал шикил зигури дусуб ву. Янаки ляхнихъ хъюгъюз гъагъиди ву. Саб аьдати шикил капIбан бадали, саки 2 сяаьткьан удубчIвуру, хъа чахъ варитIан гизаф вахт сарф гъабхьиб узу дипломный ляхниз гьязур гъапIу шикил вуйиз. Дидин яркьушин 1 метрна 20 санти, хъа ярхишин – 1 метрна 80 санти вуйи. Думу капIри, саб вазна гьацIкьан гъабхьнийиз», – давам апIура ихтилат йизсюгьбатчийи.
Сефижат Керимова чав гъизигу шиклар хьади хайлин выставкйириъ иштирак шула. Мисалназ, 2023-пи йисан Турцияйиъ кIули гъубшу, Турция Республикайин 100 йис хьпаз бахш дапIнайи выставкайиъ, Москвайиъ регионариан вуйи жигьил художникарин арайиъ вуйи выставкайиъ, Ростовдиъ Кьибла Урусатдин регионарин арайиъ вуйи 13-пи выставкайиъ иштирак гъахьну. 2024-пи йисан дугъу Москвайиъ «Урусат» ччвур тувнайи Вариурусатдин художественный выставкайиз, Пятигорскдиъ «Кьибла модерн» мина-тина гъабхру выставкайиз ва Гъубачи гъулаъ «Гъубачийин чIвурд» чап апIру графикайин Варихалкьарин арайиъ вуйи IV выставкайиз чан ляхнар адагъну. Цци Сефижатди Каспийскдиъ, Москвайиъ ва Дербентдиъ гъабхьи «Ригъун тереф» выставкайиъра иштираквал гъапIну.
Цци, Урусатдин премьер-лигайин 2025-2026-пи йисарин футболин фасил ккебгъруган, махлукьатлу хабрарин дакьатариъ «Динамо» (Мягьячгъала) клубдин футболистариз гъяйтагъдин кабчуб кади гьязур дапIнайи цIийи палат адабгънайиваликан мялуматар тувнийи. Думу формайин автор Сефижат Керимова ву.
«Футболин фасил ккебгъайиз цIиб улихьна узухьна «Динамо» футболин клубдин вакилар илтIикIнийи. Дурариз, ихь футболин командайиз чан хусуси палат гьязур дапIну ккунди айи. Асас шартI – палатдик дагъустандин накьиш капIуб вуйи. Заказ тамам апIуз 10 йигътIан вахт тувундайзуз. Шубуб жюрейин шиклар гьязур гъапIнийза, дурарин арайиъ гъяйтагъдин кабчубра, табасаран халачийин накьишра айи. Дурариз кьабул гъабхьиб гъяйтагъдин кабчуб вуйи. Гьязур дапIнайи шикил тартиб дапIну ва компьютерный программайиз адабгъну, Къубачийин худочественный комбинатдиъ станкарихъ йишв-йигъ дарпиди командайин форма гьязур гъапIнийи. ИкибаштIан, станокдихьан тамам апIуз читин вуйи йишвар, хилихъдира карчри гъахьну.
Саб гафниинди, улупнайи 10 йигъандин арайиъ форма гьязур дапIну ккудубкIунча. Командара, клубдин администрацияра гизаф рази гъахьнийи», – кIваин апIура жигьил художникди.
Сефижат Керимовайин планариъ гъюру йисан чан 30 йисандин юбилейиз бахш вуйи выставка тешкил апIуб а.
Гьамусяаьт риш думу выставка гьязур апIбиин лихура.
