Гюльнара Мягьямедова
2024-пи йисан 24-пи февралиъ Урусатдин Федерацияйи Украинайиъ хусуси метлеб айи дявдин операция ккебгъну 2 йис тамам шула. РФ-дин оборонайин министерствойи 2023-пи йисан аьхириъ Урусатдин Яракьлу кьувватарин аьгьвалат ва кьувват аьгъю апIбан бадали, яркьу анализ гъапIну. Натижайиъ, хъуркьуваларси гьял дапIну ккуни месэлйирра, камиваларра ашкар гъахьнийи. Гьаддихъди сабси, 2024-пи йисаз улихь диврайи метлебариз ва месэлйириз важиблу фикир тувну.
Ккудубшу йисан Урусатдин армияйи женгназ гьязурлугвалин заан ери ва дявдин жюрбежюр операцйириъ ужудар хъуркьувалар улупну. Генеральный штабдин кIулиъ айи Валерий Герасимовдин фикриинди, 2023-пи йисан хьадну ва чвну Украинайин кьувватар улихь гъягъбаз айи планар чIур апIувал Урусатдин армияйин хъуркьуваларикан саб ву. Урусатди Азов гьюлин гъирагъдихъди Крымдиз вуйи рякъ гъюбхну.
Гьадму анализдиъ хусуси метлеб айи дявдин операция ккебгъхъанмина сабпи ражари контракт йибтIнайи эскрарин кьадарнакан дупна – дурар 640 агъзур касдилан зиина ву. Думу кьадарнакан 288 агъзур касди 2023-пи йисан контрактдиин къулар гъизигну. Мобилизация мялум апIруси гъабхьиш, уьлкейиъ 18 йислан 60 йис’ина вуйи ватандашарин уьмуми кьадар 36 миллионтIан артухъ ву. 2022-пи йисан Урусатдин Президент Владимир Путинди мялум гъапIу бегьем дару мобилизацияйин дахилнаъди хусуси метлеб айи дявдин операцияйиз 302 агъзурилан зиина ватандашар гьаънийи. Думу кьадарнакан военкоматариз саки 10% повестка адарди, чпин хушниинди гъафидар вуйи.
2023-пи йисан Урусатдин Яракьлу Кьувватарин кьадар 1,32 миллиондиинакьан артухъ гъабхьну.
Уьлкейин ядерный кьувватарин дахилназ штун кIанаккди гъябгъру «Борей-А» классдин «Император Александр III» ракетоносец гъафну.
Йисандин арайиъ армияйиз 1,5 агъзур танкар ва 3 агъзур бронемашинар, 230 самолетар ва вертолетар, 20 агъзуриинакьан беспилотникар хътаъну.
Хусуси метлеб айи дявдин операцияйи Урусатдин армияйиз алахьурайи читин терефарра ашкар гъапIну. 2024-пи йисаз улихь дивнайи кьастарин арайиъ гьадму камивалар терг апIуб ва яракьлу кьувватар женгназ гьязурди хьувалин дережа за апIубра а. Оборонайин министерствойи дявдин техника цIийи алапIувал давам апIиди, дявдин гъуллугънаъ айидарин яшайишдин шартIар за апIбаз артухъ фикир тувди.
2024-пи йисан улихь дийигънайи метлебарикан саб уьлкейин оборона мюгькам апIуб ва хатIасузвал уьбхюб ву. Оборонайин министерствойи яракьлу кьувватар деврин тIалабариз жаваб тувру технологйирихъди ва яракьарихъди тямин апIуб давам апIиди. Дявдин гъуллугънаъ айидарин ляхнин мянфяаьтлувал за апIбан бадали, дурарин хизанарин яшайишдин аьгьвалатназ артухъ фикир тувди.
