Гюльнара Мягьямедова

1–пи апрелихъан мина Дагъустандиъ хусуси метлеб айи дявдин операцияйин иштиракчйириз, гъахьи зийнариз ва туву наградйириз дилигну, дявдин женгарин ветеранарин удостоверенйир тувди.

Украинайиъ дявдин гьяракатариъ иштирак гъахьи гьюкуматдин сяргьятариин гъуллугъ апIурайидарра, ватандаш пишейин агьалйирра, чпин хушниинди душну, хусуси метлеб айи дявдин операцияйин иштиракчйир гъахьи агьалйирра ветеранарди гьисаб шула. Эгер чпин хушниинди дина гъушдариз зиян гъабхьнуш, дурар дявдин женгарин инвалидарди гьисаб апIиди.

Дявдин гьяракатарин иштиракчйириз ва дурарин хизанарин вакилариз исихъ ктухурайи льготйир тувди:

– коммунальный игьтияжарихъан гьякьийин 50 процентдин скидка;
– хусусиятналан, гьадму гьисабнаъди квартирайилан, хуларилан ва гараждилан алдабгъурайи налогдиккан азад апIиди;
– чан ликрихъ хъайи 6 сотых участокдилан алдабгъурайи жилин налогдиккан азад апIиди;
– ляхин апIурайи дявдин женгарин ветеранариз чпин хушниинди отпуск гъадабгъуз мумкинвал хьибди;
– ляхин апIурайи йишв’ан аьлава образование, ясана пишекарвал гъадабгъуз мумкинвал тувди;
– пенсияйиз удучIвбан кьяляхъ военный поликлиникйириъ, больницйириъ ва госпиталариъ медицинайин гъуллугъар гьуркIуз мумкинвал хьибди.

Дявдин женгарин ветерандин удостоверение гъадабгъбан кьяляхъ дявдин гъуллугъчйириз саб ражари тувру пособиера гъибди (2022-пи йисан дидин кьадар 5215 манат вуйи); дурар гьюкуматдин пулсуз транспортдихъди, йисандин арайиъ кьюб ражари санаторийдиз путевкайихъди, пулсуз дармнарихъди тямин апIиди. Эгер гьаму льготар ишлетмиш апIуз ккундарш, дурарин ерина гьар вазли гъюрайи пособие артухъ апIуз хьибди.

Ветеранариз аьлава вуди пенсияйиин иливурайи пулин кьадарну социальный, ясана страховой пенсияйин 32% тяйин апIиди, гьацира дурар дявдин выплатйириинди кредитдин буржар ктирчувалихьан уьрхиди.