Наргиз Гюлечова
Гьамусяаьт Дагъустан Республикайин экономикайин министерствойин «Ерли жягьтлувалар» конкурсдиз проектар кьабул апIура.

 

Табасаран райондин Хючна гъулан поселениейин администрацияйи, 2024-пи йисан, халачйир урхру маскурра кади, административный дарамат рас апIуз кIури, «Ерли жягьтлувалар» конкурсдиъ иштирак хьуз улупна.
Табасаран райондин администрацияйин пресс-гъуллугънаан тувнайи мялуматариинди, му дарамат Хючна гъулаъ ерлешмиш дубхьна ва цIиб улихьнаси Хючнаарин сельсоветдин дахилназ гъадабгъна.

Советарин гьюкмин вахтари му дарамат машгьур вуйи «Табасаран» халачйирин объединениейин дахилнаъ айиб вуйи. Сабхилди 30-тIан артухъ халачачйири ляхин апIурайи маскурра, администрацияра либхури гъабхьну. Гьамус дарамат лап йирси дубхьна.

Хючнаарин гъулан поселение-йин глава Аьбдуселим Гираевди мялум гъапIганси, эгер чпи улупнайи проект конкурсдиъ гъалиб гъабхьиш, дараматдин гъваъ, полар, гъвардандиккишв, манишин тувбан гъурулуш, дизигнайи электрический симар ва айтIан коммуникацйир гьюдюхиди. Расвалин ляхнар аьхирихъна хпан кьяляхъ, му дарамат офис вуди ва гьацира эвелианси, халачйир урхру маскур вуди ишлетмиш апIуз мумкинвал хьибди.