Мейлан Нежефов
Хив райондин культурайин, спортдин, жигьиларин политикайин ва туризмдин кIулиъ айи Казбек Къазиевдин къарарниинди, культурайин гъуллугъчйири гьаму йигъари райондин гъуларилан чарх йивури, культурайин ужагъариъ агьалйириз концертар улупура.
Казбек Къазиевди му проектдин гьякьнаан гьамци кIура: «Магьа гьамус шубуд йис вуйич му жюрейин концерт гъулариъ улупури. Чухсагъул мялум апIбан гафарихъди, милин-тлин гьамцдар гафар-чIаларра ерхьурачуз: «Дюн’яйиъ сикинвал адар, дявйир гъягъюра, йихбар а. Гьамрар фтихъ хъайидар ву? Гьамрар гьапIрайидар ву?» Ав, сифтена-сифте гьадму ихь уьлкейиъ сикинвал адруб гьисабназ гъадабгъури гъабхурайи ляхин вуйич. Ва программайин асас метлебра агьалйирин кьюб сяаьтнакьан юкIв алдабхьувал — вуйич. Дарш, аьхю пулар ккунди, хъачIаккнайи йишв адарич. Шюкюр Аллагьдиз, ич гьялал маважибдиин рази вуча. Сабсана дарпиди кьара гъюрадарзуз. Синих кипрайидарин аьхюнуб пайнан мицдар гафар, гъи ихь культурайин, чIалнан ва аьдат-къайдайин халис лишнариин лик иливурайиб ва аргъаж шулайи насларин арайиан думу ирс гъирагъдиз алдапIурайиб аьгъдарди апIурайидар, ву. Хъа ухьу думу гъалатI деебтидархьа. Саб ушвниан улухурайидариси, гъи дурари кIура: «Мусурман диндин келимйириинди музыка ихь халкьариз гьярам ву». Хъа ихь абйир-бабари чпин фарз вуйи гъулган-жилкIан апIури гъабхьундарин? Дурар музыкайихъ хъпехъундарин? Дици даруган ухьухьна гъи сан-гьисаб адрубкьан халкьдин мяълийирна нугъатар наънан гъафидар ву? Гьаддиз кIураза, гъи ухьу дурариз рякъ тувиш ва варибдиз амин гъапIиш, закур ухьуз читин хьибди. Дурари гъи апIурайи гафар саб диндиъра улупнадар».
Концертдиз тамаша гъапIда-рихъдира сюгьбат гъабхьнийиз. Магьа дурарикан сарин фикрар «Сумчирна салам чвена чи вуйибдин гьамус гъаври ахъунзу. КIул’ин али жилир ва гъахи гъардаш гъи СВО-йиъ иштирак шулайиз. Гьелбетда, му учIврушин ипIру уьлихъдира ва алабхьру палатдихъдира гъафун дубхьнайиз. Гъит гъийин деврин ихь игитар Аллагьдиина аманат ишри. Ишуб ва гаф хъипрадарза. Хулаъ кьюр велед айиз. Гьарган узу дурариз адаш дявдиъ айибдикан кIваин хури, дурарихьан байвахт тадабгъубра дюз шуладар аьхир. Гьаддиз дурарра гъадагъну гъафунза. Вари гъарашугъариз гъи гьамци читин йигъан учухъди хъайивализ ва учуз закурин йигъак миж кивуз гъитрайивализ кIураза. Гъит ихь халкьарин арайиъ ва уьлкейиъ гьарган ислягьвалин манишнан ялав ади, ибарихъ ва юкIвариъ далдабу-зурнайин сес ибшри», – кIура хусуси метлеб айи дявдин операцияйин иштиракчийин уьмрин юлдаш Фаиза Мирзаагъаевайи.
