Мейлан Нежефов,
Зубайдат Шябанова
Хьадукран призыв давам апIури, Хив ва Табасаран районариан Урусатдин Яракьлу кьувватарин жергйириз 45 жигьил рякъ’ин гъапIну.
Хив райондиъ
Аьдат вуйиганси, призывникарихъди вуйи гюрюш Хив гъулан Гъалибвалин паркнаъ кIули гъубшнийи. Эскервалин буржи тамам апIуз гъягъюрайи ватанперверарин улихь, багахьлуйирихъди сабси насигьятнан гафар кIури, райондин глава Ярмет Ярметов, Хив ва Агъул районарин военком Сулейман Гьюсейнов удучIвну гъулхнийи.
«Гьюрматлу дустар! Гьамусди ухьу фикир тувну гъилигиш, гьаму паркнаъ ихь улихь хьайи мармардашдин гъвандин ядигарик варидарин абйирин фамилйир ка. Дурар, Ватандин Аьхю дявдин иштиракчйирси, ухьуз гъалибвал ва ислягьвал гъазанмиш гъапIу илдандин люкьярра ву. Ватандин улихь ичв буржи баркаллагьниинди тамам апIур ва, дарибшри, дярябкъри, хъа нагагь дупну герек гъабхьиш, ифдин цIадалра гьяйиф дарапIур пну, умуд кивраза. Гьаци дархьиш, ухьу ихь абйирин ва гьамусди Украинайин аьтрафариин кIули гъабхурайи хусуси метлеб айи дявдин операцияйин иштиракчи чвйирин кьимат фтиз илтIибкIур? Валлагьи, кIул мухриъ ипиш, дурари ухьуз хил алдадабгъур. Дустар, гъит улупнайи сад йисандин арайиъ учву намуслувалиинди аьхю хъуркьувалар гъазанмиш апIруганси ибшри. Ачухъди кIураза, ичв гьякьнаан учу кIул хъазабгну лицруси, абйир-бабарикан йигъан сарин аьдрисназ ичв командирарихьан чухсагъул мялум апIру кагъзар гъюр кIури, ккилигурача», – гъапнийи райондин главайи.
Табасаран райондиъ
Призывдин гьякьнаан улихьнаси муниципалитетдиъ гъабхьи совещаниейиъ гъапнийи.
Табасаран райондин военный комиссар Садикь Мурадялиевди къайд гъапIганси, гьаму йисан 1-пи апрелихъанмина райондиъ военный комиссия гъубху 110 жигьиликан 37 кас ватандин улихь чпин буржи тамам апIуз гъушну. Райондиъ армияйиз гъахру яшарикк ккуркьнайи жигьилар йишвариин алдрували призывдин кампанияйиз ва эскервалинна гьисабарин серенжемар гъахру комиссияйиз манигъвал тувра.
«Мидланра гъайри, эскервалин гъуллугънахьан отсрочка гъадабгъуз къанундиинди вари ихтиярар айи касари, мисалназ студентари, чпи вузариъ урхурайиваликан ВУС-диз хабар дебккрадар. Гьисабари улупурайиганси, дурарин кьадар саки 70% ву», – къайд гъапIнийи комиссари.
Табасаран райондин глава Мягьямед Къурбановди, уч духьнайидарихьна, гьадму гьисабнаан тешкилатарин ва карханйирин кIулиъ айидарихьна, ихтиярар уьрхру органарин вакиларихьна, гъуларин поселенйирин главйирихьна ва райондин администрацияйин гъуллугъчйирихьна илтIикIури, призывдин кампанияйин месэлайиз варидари фикир тувну ккуниваликан гъапну.
«Призывдин кампания ялгъуз саб военный комиссариатдин вазифа дар. Дидиз эскервалин гьисабназ гъадагъру идарайин вакилари, гъуларин поселенйирин главйири, ихтиярар уьрхру органарин вакилари, медицинайин гъуллугъчйири кюмек тувну ккунду. Му месэлайиин вари гьаму идарйир сатIиди гъилихиш, натижйирра рази шлудар хьиди. Хъа абйир-бабариз дурарин веледар хусуси метлеб айи операция гъябгъюрайи йишвариз гьадраъруваликан мялумат тувну ккунду», – аьлава гъапIнийи райондин кIулиъ айири.
КIваин апIуз ккундучуз, хьадукран призывдин кампания райондиъ 1-пи апрелиан 15-пи июлизкьан давам хьибди.
