Мейлан Нежефов
Ухьуз рябкъюрайиганси, Урусатдин яракьлу кьувватари Украинайиъ гъабхурайи хусуси метлеб айи дявдин операцияйиъ жюрэтлувал улупурайи ва гъалибвал багахь апIбак чпин лайикьлу пай киврайи ихь ватанагьлийир кми-кмиди медалариинди, орденариинди лишанлу апIури, гизафдар заан дережайин гъуллугъарихь дерккра. Мидланра савайи, дурарин ччвурнахъ чпи урхури гъахьи мектебариз, тербияламиш гъапIу абйир-бабариз, гъуларин, районарин ва шагьрарин администрацйириз чухсагъул мялум апIбан ва гьюрматнан кагъзарра гъюра.
Гъийин йиз макьалайин игит Замир Везиров (шиклиъ) ву. Замир Закирович Везиров 1993-пи йисан 30-пи ноябри Хив райондин Хив гъулаъ Везироварин хизандиъ бабкан гъахьну. Гъулаъси, вари табасаранлуйирин арайиъра му фамилия таниш дару кас бажагьат дихъур. Дугъриданра, гьадму ихь бажаранлу шаир, журналист ва жямяаьтлугъ кас Асланбег Везиров гьаму макьалайин игитрин аьхю аба ву.
Замир чпин хьур велед айи хизандиъ кьюрпир ву. Дугъан адаш Закир хайлин йисари контрактник вуди, хъасин гъулаъ бицIидарин багъдиъ завхозди лихури гъахьну. Гьяйифки, гьаму кьанди инсафсуз уьзри думу ихь арайиан гъухну. Дада Саният, халис табасаран халачачи, чIат’ан хулаз гъабхибдин эвел дапIну, хьур велед дюрхну, дурар аьхю дапIну, ликриин апIурайи баб ву.
Вари гъулан баярси, Замирра аьхюдариз хулан ляхнарин кюмекчиди бакар шули аргъаж гъахьну. 2000-пи йисан думу сабпи классдиз гъягъюру ва 2011-пи йисан дугъу Хиварин М. Шамхаловдин ччвурнахъ хъайи кьялан мектеб ккудубкIуру. Баркаллагьниинди армияйин буржира тамам дапIну, дугъу Чечен Республикайиъ военный контракт йибтIуру ва 2015-2018-пи йисари Шелковской станицайиъ отделениейин командирин вазифйир тамам апIури гъахьну. Хъасин, контракт давам дапIну 2018-2023-пи йисари Чечен Республикайин Гудермес шагьриъ отделениейин командирди гъуллугъ апIуру. 2019-пи йисан эвленмиш гъахьну.
2019-2020-пи йисари Сирияйиъ, 2022-пи йисан Замир Везиров Ингушетияйиъ, 2023-пи йисхъанмина гьамусдизкьан ДНР-иъ взводдин командирин заместителди лихура. Хусуси метлеб айи дявдин операцияйиъ гъабхьи гъагъи зиян бегьем сагъ хьайизра, баяр ккилигуразуз кIури, хъана дявдин майдандиз гъягъюз гьяракатнаъ а.
Игит наслин вакил, жил’ин ислягьвал ккунди ва гьякь’вал йишв’ина хуз ният ади гъаних душман ккуршвуз кьаст айи Замир йицIбариинди гьюрматнан ва чухсагъул мялум апIбан кагъзарин ва медаларин сагьиб ву
Замири чан уьмрин юлдаш Саяддихъди Мухаммад кIуру веледра тербияламиш апIура. Дурар тамарзуди адашдиз ккилигура. Дюн’яйиъ ислягьвал дубхьну, гъалибвалин хабар хьади игит чан хизандихьна сагъ-саламатди хъадакну гъюб ккун апIурхьа.
