Зубайдат Шябанова
Улихьна йигъари Табасаран райондин глава Мягьямед Къурбанов СВО-йиъ кечмиш гъахьи Хянягъ гъул’ан вуйи сержант Ражаб Къурбановдин ва Вечрикк гъул’ан вуйи ефрейтор Самрат Гьямзаевдин абйир-бабарихъди гюрюшмиш гъахьну. Серенжем райондин администрацияйин дараматдиъ кIули гъубшнийи.
Гъийиху эскрарин багахьлуйирихъди вуйи гюрюшдиъ Табасаран райондин жямяаьтлугъ тешкилатарин, диндин ва военкоматдин вакилар, Куркакк ва Хюрикк сельсоветарин главйир иштирак гъахьну.
Уч духьнайидари эскрарин хизанариз башсагълугъвалин гафар кIури, ватанди чпин улихь дивнайи буржи тамам апIбаъ игитвал улупу баяр тербияламиш апIбаз дурариз чухсагъул мялум гъапIну.
«Ичв баяр Ватан бадали чпин жанар туву игитар ву. Абйир-бабарин гъянаъ айи му учIвру дерд гьял апIуз шлу кьувват адар, хъа учу ич терефнаан учхьан удукьру вари кюмек тувуз гьязур вуча, гьадму гьисабнаан эскрар уьмурлугъ кIваинди гъитбан месэлйиризра», – гъапну Мягьямед Къурбановди.
Гюрюшдиъ Самратдин адаш Рамис Гьямзаевди багъри гъулаъ айи чан хусуси жилиин бицIидариз майдан тикмиш апIуз ва дидиз чан балин ччвур тувуз кьаст айиваликан гъапну. Райондин главайи эскрин адашдин ниятариз заан кьимат тувну ва думу ляхин ккабалгуз жавабдар касар тяйин дапIну, дурариз тялукь табшуругъар тувну.
«Йиз Самрат армияйиъ Абхазияйиъ гъахьнийи. Гьадушваъ контрактдиинди гъуллугънаъ гъузну. Думу чан эскервалин гъуллугънан сабпи йигъхъанмина танк хъапIрур, танкар рас апIрур вуйи. Хусуси метлеб айи дявдин операция ккебгъу йигъланмина Украинайин аьт-рафариин алди гъахьну. Дугъан сумчир апIуз планарик кади гъабхьнийич. Амма операция ккебгъу йигъхъанмина думу анжагъ сабан, январ вазлин эвелиъ, 10 йигъаздитIан деетундайи. Гьадму йигъариканра учухъди думу хьуд йигъантIан гъахьундар.
Самрат цци июндин вазли, Донецк областдин Соледар кIуру шагьур уьбхюрайиган, кечмиш гъахьну. Думу ва шубурсан эскер айи танклиз душманди гъагъи яракьдиан гъивнийи. Жара ихь эскрариз танк гъутIубкIуб дябкъну, дурари экипаж гьяракатниинди убгурайи танклиан адагъну. Амма баяр юкьридра сарун дийихну айи.
Самрат хизандиъ сарпи велед вуйи. Гьамус сар байна кьюр риш имизуз. Кьюрпи байра контрактдиинди лихурайиз. Думу Владивостокдиъ моряк ву», – гъапну ич сюгьбатнаъ Самратдин дада Зильфира Гьямзаевайи.
Хючна администрацияйиъ гъабхьи гюрюшдин аьхириъ Мягьямед Къурбановди Самратдин адаш Рамис Гьямзаевдихьна ва Ражабдин дада Зарият Къурбановайихьна чпин веледари хусуси метлеб айи дявдин операцияйиъ эскервалин буржи тамам апIбаъ улупу дирбаш’валин ва игитвалин лишнар тасдикь апIурайи лайикьлу пешкеш – Кьягьялвалин орденар тувну.
Гюрюшдиъ Ругуж гъул’ан вуйи Руслан Гьяжимурадовдиз Суворовдин медаль тувувалра мялум гъапIнийи. Русландихьан гюрюшдиз гъюз гъабхьундайи, ва медаль дугъан уьмрин юлдаш Наимайихьна тувнийи.
