Гюльнара Мягьямедова

Урусатдин Игит Муслим Муслимов Украинайиъ гъябгъюрайи хусуси метлеб айи дявдин операцияйиъ эскервалин гъуллугъ тамам апIурайи вахтна гъакIну. Дидин гьякьнаан Дагъустандин Глава Сергей Меликовди чан телеграм-каналиъ мялумат тувра. Игитри мотострелковый 74-пи бригадайиъ гъуллугъ апIурайи. Дугъу военный гъуллугънаъ аьдати эскрилан офицериина рякъ ккадапIну.

 

«Хусуси метлеб айи дявдин операция гъябгъюрайи йишв’ан гъагъи ва пашман хабар гъафну: дявдин операция ккебгъхъанмина ихь 12-пи Урусатдин Игит гъахьи Муслим Муслимов уьмриан гъушну», – гъибикIну региондин кIулиъ айири.
Аьхюну лейтенант Муслим Муслимовдин 27 йистIан дайи. Дугъан хулаъ кьюр бицIи риш ва хпир гъузну.

Сергей Меликовдин гафариинди, Муслимов хусуси метлеб айи дявдин операция ккебгъу садпи йигъариланмина женгар гъахурайи йишваъ айи. Дагъустандин главайин къайд гъапIганси, офицериз чан хиликк ккайи эскрарин терефнаан аьхю гьюрмат ади гъабхьну..
2024-пи йисан женгариъ кьягьялвал ва игитвал улупбаз дилигну Муслим Муслимов уьлкейин варитIан заан – «Урусатдин Федерацияйин Игит» ччвурназ лайикьлу гъахьнийи. Дугъаз Урусатдин оборонайин министр Андрей Белоусовди «Гъизилин Хяд» тувнийи. Муслимовдин хиликкди мотострелковый ротайи Авдеевкайин багахь саб вазлин арайиъ душмандин опорный миржиб пункт дагъитмиш дапIну, рекорд улупнийи, гьацира ВСУ-йин рукьанна бетондин гъурулушар ва тикилишчивалин алатар гьясил апIру ва мюгькамди уьбхюрайи завод гъибиснийи.

«Гьамцдар хъуркьуваларихъна гъафнушра, Муслим Муслимовдин метлеб награда гъадабгъуб дайи, дугъан метлеб чан улихь дивнайи месэла тамам апIуб ва чан хиликк ккайи эскрарин уьмрар уьрхюб вуйи», –къайд дапIну Дагъустандин главайи.

Сергей Меликовди гъакIи офицерин хизандиз, багахьлуйириз башсагълугъвал ккун апIури, чан дерин пашманвал мялум гъапIнийи.