Мейлан Нежефов
17-пи августди ихь ватанагьли, Урусатдин Игит, генерал-лейтенант, «Кафари» кьушмарин дестейин командующийин заместитель Эседулла Абачев Курский областдиъ Украинайихъди вуйи сяргьятарин багахь хатIалу дюшюшнаъ ахъували дагъустанлуйирикси, саки вари Урусатдин агьалйирик гъалабулугъ кипну. Му вахтнан арайиъ Москвайиъ аьзарханайиъ ккаънайи ихь игитрихьна чан чвйир-чйир, Дагъустандин кIулиъ айи Сергей Меликов, Госдумайин депутат Хизри Абакаров, Дагъ. Огни шагьрин мэр Замир Гьяжимурадов, Хив райондиз регьбервал туврайи Ярмет Ярметов, Зилдикк гъулан глава Аьбдуляким Гьюсейбегов ва гьацира генералихъди дявдин женгариъ гъахьи ярар-дустар улукьуз гъюри-гъягъюри а
Кьягьялвалин ордендиз лайикь гъахьи дявдин корреспондент, ихь ватанагьлийихъди ужуди таниш вуйи Семён Пеговра дугъ’ин улукьуз гъушну. Чан телеграм-каналиъ дугъу гьамци бикIура:
«Гьаму улихьнаси узу ихь Урусатдин Игит, кIубан генераларикан сар вуйи Эседулла Аьбдулмуминовичдихъди гюрюшмиш гъахьунза. Саб вахтна думу Луганск Халкьдин Республика азад апIру армияйин 2-пи корпусдин командир вуйи, хъасин ЗВО-йин командирин заместителин вазифйир кIули гъахури, Харьковский область миллетчйирихьан азад апIбаъ иштирак гъахьну.
2023-пи йисан хьадан вахтна узу дугъахъди му областдин азад дапIнайи Кузёмовка кIуру гъулаз гъушнийза ва душваъ фици мукьан заан дережайин гъуллугънаъ айи командири, чан хликк ккайи аьдати эскрарихъди саб сенгриъ гъунши гьюкуматдин сяр-гьятарихьан ярхла дару йишвахь (думуганна гизаф дронар тIирхури шуйи) чан вазифйир баркаллуди кIули гъахуйиш, йиз уьмриъ сабпи ражари вуди гъябкънийзуз.
2024-пи йисан августдин вазли Курский областдиин миллетчйир алархьу вахтна, Э. Аь. Абачев, Суджа шагьрин аьтрафарихъна вартIан ухди дуфну, инсафсуз душмнарихьан мушван жилар азад апIуз хъюгъну. Алархьнайидарин метлеб – АЭС айи Курчатов кIуру шагьур бисуб ва хъасин чпин тIалабариинди Урусатдихъди йикьрар йитIуб вуйи.
Йиз фикриан, гьамус мидкан пуз шулу, эгер гьадму лазим вуйи дакьикьайиъ, лазим вуйи йишв’ин ихь генерал-лейтенантди, чан командайин пункт Большое Солдатское кIуру гъулаъ гъибтну, душмниз кьастар кIулиз адагъуз манигъвал гъапIундайиш, аьгьвалат кьадар адрубкьан гъагъиб шуйи. Му читин вахтна дугъу чан ляхнин гъаври айиваливалиинди ва жвуван кIубанвалиинди ихь Урусат аьхю бедбахтвалихьан гъюбхну.
Эседулла Аьбдулмуминовичдин му рягьят дару рякъюн пайнаъ дицикьан кIваин дарапIрайи гьядисара а. Думу чан гъаравларихъди, 2024-пи йисан 22-пи мартди Красногорск шагьриъ айи «Крокус Сити» кIуру центриъ теракт гъапIу террористарра дисбаъ иштирак гъахьну.
Пуз ккундузуз, душмнари хиял дарапIри, ихь генерал гъагъи гьялнаъ ими кIури. Дугъаз кьаназ госпиталариъ дахъну гъузуз ккунди адар. Ихь генерализ айи командирвалин тажрубайина аьгъювалари хъанара Ватандиз мянфяаьт хрубдиин умудлу вухьа, дустар».
Генералин чве Абулферз Абачевдинна Зилдикк гъулан глава Аьбдуляким Гьюсейбеговдин гафариинди, ихь игитрин сагъламвал йигълан-йигъаз ужуб терефнахъинди дигиш шула. Му ужудар хабрари ухьу кьадарсуз шад апIура. Гъагъи зийнар духьнайи чвуччвун дердну ккагъ найи Гюльпери Абачевайи ич сюгьбатнаъ гьамци гъапну: «Чвуччвун дерд чуччуз гизаф учIвруб ву. Му хатIалувал дугъ’ин улубкьу сифте йигъари кIул кIулихъ хътарди, му дерд ипIру уьлихъдира, алабхьру палатдихъдира гъафун дубхьну, авара духьнайзу. Гьамус дугъхьан узуз зенгар айивалиан, учв чан мелзналан улхурайиган, юкIв сацIиб вушра илцифнийиз. Йиз терефнаан чвуччвузра, ихь вари баяризра сагъ’вал ккун апIураза! Гъалабулугъ кипру гьядисйир ккудукIну, ихь уьмриз ислягь йигъар ухди гъюри!»
Газатдин редакцияйин, газат урхрударин, ихь республикайин вари халкьарин терефнаан Эседулла Аьбдулмуминовичдиз ухди сагъ хьуб ккун апIурахьа!
