Мейлан Нежефов
2007-пи йисхъанмиа ихь уьлкейиъ 9-пи декабрь Ватандин Игитарин йигъ вуди къайд апIура. Урусатдин саки вари шагьрар, районариъ му йигъ яркьуди къаршуламиш апIури, саб жерге ватанпервервалин гьиссар ачухъди улупру серенжемар кIули гъухну. Гьадму гьисабариъ Хив районра а.
Машквран гъаншариъ, райондин культурайин хулаъ «Вахтну учу ктагъну» акция кIули гъубшнийи. Уч духьнайидарин улихь райондиан Украинайиъ гъябгъюрайи хусуси метлеб айи дявдин операцияйиъ иштирак шулайи, жюрбежюр зийнар духьну, отпускдиз дуфнайи игитар удучIвну гъулхнийи. Дурари, «Ватан» ва «дада» кIуру кьюб гафну чпин уьмриъ фициб роль уйнамиш апIураш, гьаддикан кьатI’иди ва мяналуди ктибтнийи.
Гъуларин мектебарин «Сар-пидарин гьяракат» дестйириз райондин ОМВД-йин начальник, полицияйин подполковник Насир Ягъибеговди ва Росгвардияйин РД-йиъ айи управлениейин политический ляхниан ротайин командирин заместитель, полицияйин майор Гьяжирамазан Шагьмардановди «Игитарди бабкан шлуб дар. Дурар уьмри арайиз хуру» кIул тувнайи лекция гъурхнийи. Гьадушваъ, варж суалназ, варж жаваб туври, аргъаж шулайи насларин ватанпервервалин гьякьнаан вуйи аьгъювалар ахтармиш апIури, офицерар дурариз цIийи агъювалар тувбиин гъилихнийи.
Райондин музейиъ лихурайи гъарашугъари «Дагъустан, яв 13 игитриинди дамагъ апIурача» кIуру серенжем тешкил гъапIнийи. Серенжемдиъ Урусатдин Игит, генерал-лейтенант Эседуллагь Абачевдин дада Угълан Абачева (шиклиъ) иштирак гъахьнийи. Юкьур бай ва сар хтул дявдин майдандиъ айи бабу, чан баярин кьисматнакан, дурарин пишекарвалин рякъкан ва гъи пис йигъан вафалувалиинди Ватан уьбхбан гъуллугънаъ чан баярра шерик хьуваликан ктибтнийи.
Мажвгларин кьялан мектебдиъ, чпихь урхуб ккудубкIу, Урусатдин Яракьлу кьувватари Украинайиъ гъабхурайи хусуси метлеб айи дявдин операцияйиъ гьунарар улупури талаф гъахьи рядовой Вягьид Эфендиевдин, прапорщик Гюльмягьямед Къалабеговдин, лейтенант Мизамудин Зульфикьаровдин, бицIину сержант Гьяжигъурбан Мирзаагъаевдин, ефрейторар Нурадин Нурмягьямедовдин ва Гъисматулагь Нежефовдин суратар кайи мармардашдин гъванар керхну. Гьадму йигъан игитар фикриъ уьрхюри, багъри гъулан ругариин али дурарин накьвар гъеерццу укIар-кIажарихьан ва кьаларихьан марцц гъапIнийи.
Ургъа гъулан мектебдиъра гьадму хусуси метлеб айи дявдин операцияйиъ уьмриан гъушу Гьяжимурад Фарзялиев, Альберт Сефербегов ва Шихяли Шихялиев фикриъ уьрхюри, ачухъ дарс, улихьна йигъари керхнайи мармардашдин гъванарихъ кюкйир дивбан ва, ужудар чагълариъ айи вахтна дявйириъ уьмур кьатI гъабхьи жигьилар фикриъ уьрхюри, саб дакьикьайин арайиъ ккебехъну гъузбан серенжемар кIули гъухну.
Ватанпервервалин серенжемарин натижйир йивури, РКДЦ-йин айвандикк СВО-йиъ талаф гъахьи баярин шиклар жа-жаради гьязур дапIну, дурарин улихь райондин администрацияйин гьякимари кюкйир дивнийи.
Ватандин Игитарин йигъ къаршуламиш апIури, Кашкентдин мектебдиъ багъри Ватан уьбхбан гъаравлиъ чан жан фида гъапIу ва ужудар натижйириинди чпихь мектеб ккудубкIу Ямудин Аслановдиз бахш дапIнайи «Игитрин парта» абццну.
Партайиин кьягьялин сурат, дугъан уьмрикан ва ватанпервервалин рякъюъ улупу гьунарарикан дибикIнайи баннерар аларсна.
Мектебдин администрацияйин къарарниинди игитрин ччвурнахъ хъайи партайихъ, мектебдиъ ва райондиъ гъахурайи серенжемариъ ва урхбаъ аьхю хъуркьувалар улупу бицIидар деъди. Аргъаж шулайи наслариз кьягьял гьаргандиз нумунади гъузди.
