Зубайдат Шябанова
Гьаму йигъари Дагъустандин Огни шагьриъ 1-пи нумрайин мектебдиъ Украинайин аьтрафариин хусуси метлеб айи дявдин операцияйиъ ватандин маракьар уьрхюри, чан улихь дивнайи метлебар тамам апIурайи вахтна игитарси кечмиш гъахьи ихь ватанагьли Абудин Шябановдиз ва азербайжан халкьдин бай Рамиль Мирзоевдиз кIваин уьрхбан тахтйир ачмиш апIбахъди аьлакьалу серенжем кIули гъубшну.
Гьюрматнан митингдиъ Дагъу-стандин Огни шагьрин администрацияйин вакилар, мялимар, мектебдиъ урхурайи баяр-шубар, Абудиндин ва Рамилин абйир-бабар ва СВО-йиъ гъийиху жара эскрарин багахьлуйир иштирак гъахьну.
Абудин Шябанов Хив райондин Гъвандикк гъулаъ бабкан гъахьну. Думу Урусат Федерацияйин оборонайин министерствойин гвардияйин 25-пи полкнан жиниди разведка гъабхру хусуси дестейин эскер вуйи. Хусуси метлеб айи операция ккебгъу йигъхъанмина Абудин Украинайин аьтрафариин алди гъахьну. Думу дронарин, яна цIийи технологйириинди дапIнайи завлан тIирхру бицIи аппаратарин ужур пишекар вуйи. Абудин Шябанов Херсонский областдин Казачьи лагери гъулан рякъяр ва аьтрафар, багарихь хьайи нацистар ккеънайи, дурарин яракь гьитIибкIнайи йишвар ахтармиш апIурайи вахтна игитси кечмиш гъахьну.
Рамиль Мирзоев Дагъустандин Огни шагьриъ бабкан гъахьну. Сифте аьдати мектебдиъ, хъасин Дербент шагьрин кадетарин мектебдиъ гъурхну. Думу ужуб хасият хъайир, чан улихь дивнайи метлебар вари тамам апIрур ва аьгъювалар гъадагъбахьна аьшкь айир, жямяаьтлугъдинна спортдин серенжемарин жанлу иштиракчи вуйи. Карачаево-Черкессияйиъ университетдиъ урхурайи йисари Рамиль вари Урусатдин илмарин ва ахтармишарин конкурсдиъ гъалиб гъахьну. 2016-пи йисан Новосибирскдиъ заан военный училищейик урхуз кучIвну. Училище ккудубкIу жигьил лейтенант Уссурийск шагьриъ ерлешмиш дубхьнайи 24776-пи частнан взводдин командирди гьаъну. 2022-пи йисан думу чан частнан дахилнаъди Украинайиз гьушну. Рамиль июндин вазли 2023-пи йисан гъизгъин женгариъ кечмиш гъахьну.
Уч духьнайидарин улихь улхури, Дагъустандин Огни шагьрин администрацияйин аппаратдин кIулиъ айи Идаят Гьисиновди СВО-йин эскрарихьна гьюрмат уьбхюз вари буржлу вуйиваликан ва гележегдин наслин ислягь уьмрихъ чпин жанар фида гъапIу кьягьял баярин игитвалар инсанарин кIваъ уьмурлуг гъузруваликан гъапну.
«Жара эскрарси, ихь шагьрин баярра саб дакьикьайиъ кьяляхъ гъузрадар. Ватандин маракьар уьрхюри, женгнаъ улихь гьудучIвдарин арайиъ ихь баярра а. Гьяйиф, аьжал адру дяви шлуб дар. Абудин Шябановсдар, Рамиль Мирзоевсдар игит-эскрар амдар пуз гъагъиди ву. Ихь метлеб дурарихьна вуйи гьюрмат уьбхюб вуйихь. Абудиндин ва Рамилин абйир-бабариз мицисдар дирбаш эскрар, ватандин вафалу игитар, ватанпервер баяр гъюрхю ва тербияламиш гъапIу учвуз узхьан, администрацияйин ва вари шагьрин агьалйирин терефнаан чухсагъул ва баркаллагь мялум апIураза», – гъапну Идаят Гьисиновди.
Дагъустандин Огни шагьрин 1-пи нумрайин мектебдин директор Низами Агъабеговди Абудиндин ва Рамилин уьмрикан, дурари мектебдиъ урхури гъахьи йисарикан ва дурарин жумартваликан ктибтну.
Митингдиъ гьацирра Абудин Шябановдин адаш Аьбдулнасир Шябановди ва Рамиль Мирзоевдин дада Саида Мирзоевайи шагьрин администрацияйин вакилариз, мектебдин директориз ва мялимариз, чпин баяр кIваълан гьадраъбаз чухсагъул мялум гъапIну.
Митингдин вари иштиракчйир эскрин гьюрматназ саб дакьикьайи ккебехъну гъузну, ва хъасин дурари игитарин шикил кайи кIваин уьрхбан тахтйирихь кюкйир дивну.
