Зубайдат Шябанова
Хусуси метлеб айи дявдин операцияйин женгариъ кечмиш гъахьи Табасаран райондин Ярса гъул’ан вуйи Малик Ражабов, чан улихь дивнайи вазифйир игитвалиинди ва фидакарвалиинди тамам апIувализ лигну, Урусатдин Президентдин къарарниинди Кьягьялвалин орден тувбиинди лишанлу гъапIну.
Гьаму йигъари думу орден Табасаран райондин глава Мягьямед Къурбановди Маликдин адаш –Иманяли Ражабовдин хилиз тувнийи. Серенжемдиъ райондин комиссар Садикь Мурадялиев ва райондин главайин заместитель Ринат Мирзабалаев иштирак гъахьнийи.
Муниципалитетдин главайи Иманяли Ражабовдиз башсагълугъвал ккун апIури, дурарин бали ватан бадали гъахурайи женгариъ лайикьлу игитси учв улупуваликан, думу вари райондиз намуна гъахьиваликан ва дурарин хизандиз райондин администрацияйин терефнаан удукьру кюмек тувуз гьаммишан гьязурди вуйиваликан гъапну.
Малик Ражабов чан хушниинди хусуси метлеб айи операцияйиз гъушу эскер-контрактник вуйи. Дугъу Донецкдин терефнаъ мотострелковый полкнаъ гъуллугъ гъабхури гъахьну. Уьлкейин маракьар уьрхюри, командованиейин улихь дивнайи месэла гьял апIурайи вахтна нацистари ракетйир деетну гъахьи зийнариан Малик кечмиш гъахьну.
Маликдин адашди райондин главайиз СВО-йиъ гъийиху эскрарин хизанариз туврайи кюмекназ чухсагъул мялум гъапIну ва, чпи яшамиш шулайи кюче Маликдин ччвурнахъ дигиш апIуз мумкинвал аш, гьерхну. Дугъан гафариинди, Ярса гъулан кючйириин СВО-йиъ гъийиху эскрарин ччвурар иливну ккунду, хъа гъийин йигъаз гъулаъ 8 эскер дийихна. Думу эскрар чпин ччвурар гъуландарин кIваъ уьмурлуг гъузуз ва аргъаж шулайи наслин нумуна хьуз лайикьлу ву.
Райондин главайи эскрин адашдиз чахьан шлу вари кюмек тувуз гьязур вуйиваликан гъапну ва Ринат Мирзабалаевдизна Ярса гъулан поселениейин глава Аьбдулла Аьбдуллаевдиз тялукь табшуругъ тувну.
КIваин апIуз ккундучуз, улихьнаси Ярса гъул’ан вуйи, СВО-йиъ кечмиш гъахьи сарсана игит – Жяфар Гьязаровдин Кьягьялвалин орден багахьлуйирихьна тувбан гюрюшдиъ, дурарин хизанарин вакиларира райондин кIулиъ айи Мягьямед Къурбановдикан чпин балин ччвур гъулан кючейиин иливуб ккун гъапIнийи.
