Гюльнара Мягьямедова
Гьар йисан 9-пи декабри ихь уьлкейиъ Урусатдин Игитарин йигъ къайд апIура. Аьхиримжи йисарин арайиъ гизаф аьхю дару табасаран халкьдин арайиан Урусатдин Игит ччвурназ 4 кас лайикь гъахьнийи. Дурарин гьунарариз заан кьимат туври, гъи ухьура ихь игитарин ччвурар кIваин апIурхьа.
2017-пи йисан Урусатдин Федерацияйин Игит ччвурназ Табасаран райондин Ханак гъулан вакил Рустам Мурадов лайикьлу гъахьнийи. Дугъаз, РФ-дин Яракьлу Кьувватарин дестейин дахилнаъди Сирияйиъ варихалкьарин террористарин Урусатдиъ гъадагъа дапIнайи тешкилатдиз аькси вуйи дявдин операцияйиъ лишанлу хьпаз дилигну, Урусатдин Игит ччвур тувнийи. Гьамус генерал-полковник Рустам Мурадов Украинайиъ хусуси метлеб айи операцияйин кIакIнаъ айи кьушмарин аьхюдарикан сар ву.
Хив райондин Зилдикк гъулан вакил Эседулла Абачев 2022-пи йисан 4-пи июли Урусатдин Федерацияйин Игит ччвурназ лайикьлу гъахьну. Дугъан гьунар Украинайиъ гъябгъюрайи хусуси метлеб айи дявдин операцияйиъ Луганск бисруган улупу игитвалихъди аьлакьалу ву. Хъа 2023-пи йисан 17-пи феврали РФ-дин Президентдин указдиинди Эседулла Абачевдиз генерал-лейтенант ччвур тувну. 2025-пи йисан 17-пи августди душмандин ракетайиан йивбар гъапIу вахтна Эседулла Абачевдиз гъагъи зийнар гъахьнийи. Гъи думу сагъ духьну, душмандихъди имбубсан ижмиди женг гъабхуз гьязур шула.
Табасаран райондин ТIаттил гъулан вакил Руслан Къурбанов ихь варитIан жигьил Урусатдин Игит ву. Украинайиъ гъябгъюрайи хусуси метлеб айи операцияйиъ дугъан хиликк ккайи танкарин взводди душмандин техникайин 36 танк, минометдин батарея ва 200 миллетчи дагъитмиш гъапIну. Гьаму улихьнаси жигьил игитриз имбу эскервалин ччвурарси вахтназ улихьна подполковникдин ччвур тувну. Думура хусуси метлеб айи дявдин операция гъабхурайи эскрарин кIулиъ а.
Гьяйифки, ихь игитарикан сар, Табасаран райондин Хянягъ гъулан вакил, капитан Исрафил Мягьямадов Урусатдин Игит ччвурназ йикIбан кьяляхъ лайикь гъахьну. Исрафил Мягьямадовди Херсондин областдиъ «Корнет» ПТРК-йиан йивури, йицIбариинди душмандин бронетехника дагъитмиш гъапIну. Думу Херсондин ругар уьрхюри, 2022-пи йисан 15-пи октябри гъакIну.
Дугъан хизандиз Урусатдин Игитрин Гъизилин Хяд Дагъустандин Глава Сергей Меликовди ва Исрафил Мягьямадовди гъуллугъ апIури гъахьи Кафари флотдин командующий адмирал Александр Моисеевди тувнийи.
Зиихъ ктуху Урусатдин Игитарилан савайи, хусуси метлеб айи дявдин операцияйиъ иштирак шулайи ва гьацира думу операцияйиъ игитарси гъийиху вари эскрар дирбшар ву. Гъийихдар Аллагьдин рягьматдикк ишри, имбудар Аллагьди наан ашра сагъ-саламатди гъитри.
