Мейлан Нежефов

«КIваин уьрхбан багъ» акцияйин дахилнаъди Хив райондиъ учIвру аьтрафариъ мектебарин, бицIидарин багъарин ва администрацйирин гьяятариъ гъелемар кивуб райондиъ ужуб аьдат дубхьна.

 

Гьаци, нубатнан ражари му акция-йин шилнаъди сумчIурихьна гъелемар Мажвглaрин кьялан мектебдин икриъ кивнийи. Гъелемар итбаъ мектебдиъ урхурайидар, мялимар ва мешебегйир иштирак гъахьнийи.
ЙицIихьуд йисан гъулан главади гъилиху, хъа гьамус мектебдиъ обществознаниейин дарсар киврайи мялим Гъадир Хидировди акцияйикан чан фикрар ачухъ гъапIнийи.

«Саки вари Урусатдиъ гъабхурайи му акцияйиъ гъи ич мектеб иштирак хьпаъ узу кьадарсуз шад вуза. Чухсагъул мялум апIураза гъелемариз кюмек туву райондин мешебеглугъдин кIулиъ айи Загьидин Батмановдиз, дугъан гъарашугъ Рамид Велибековдиз, гъелемар кивуз йишв улупу мектебдин администрацияйиз ва дурар итбаъ чан хусуси пай киву 9-пи классдиз ва классдин руководителиз.

Му акцияйин шилнаъди учу киву гъелемариз гьам Ватандин Аьхю дявдиъ, гьамсана Чечен дявдиъ ва гьамус СВО-йиъ талаф гъахьи ич выпускникарин ччвурар туври, бизар дарди дурар кIваина хурача.
Маргъар-тIулар хъурсбалан кьяляхъ мектебдин администрацияйин ва мялимарин бирмиш-буйругъниинди нубатнахъди вари классари дурарихъ пейин хъабхьри, штар хъурзуб аьдатнаъ абхъди. Ихь кьягьяларин ччвурар гьамци насларихьан-насларихьна аьсрариинди рукьури гъубзди, кIури, умудлу вуза» – къайд гъапIнийи Гъадир Жавадовичди.