Мейлан Нежефов

Хив райондиъ игитарин гьюрматназ сабсан багъ ибтну. Думу райондин ЗахитI гъулан кьялан мектебдин икриъ ерлешмиш дубхьна. Багъ кьягьяларин абйир-бабари, багахьлуйири, гъулан ва райондин администрацияйин гьякимари, мектебдиъ урхурайидарин ва гъийиху игитарин дявдин дустарин иштираквалиинди кивнийи.

«Умудлу вуза, гъи ухьу киврайи йимишарин гъелемар закур йигъан яр-йимиш тувру бегьерлу гьарар шул, кIури. Гьарсаб гьариз Игитрин хусуси ччвур тувнача. Гъит, жил’ин ислягьвал ва дюзвал хьуз ният ади уьмриан гъушу кьягьяларин ччвурар фагьмиъ ва фикриъ насларихьан-насларихьна гьамци рукьури гъузри. Хъубкьу йимиш гъипIу-гъипIуриз Аллагьди, думу гьариз чан ччвур тувнайи игитрин рюгьяриз дюъйир бахш апIуз амур туври, хъа игитар чиб ихь юкIвариъ ва уларикк аьсрариинди гъузри», – гъапнийи мектебдин директор, филологияйин илмарин кандидат Руслан Гъарабеговди.

Мектебдин икриъ му йигъан 20 йимишдин гьарар кивнийи.