Мейлан Нежефов
Гъи Украинайин дахилнаъ ади гъахьи жилариин агьалйирин уьмрин цIийи къайда гъурмиш апIбан бадали вуйи женг гъябгъюра. Гьамусяаьт думу женг дюн’яйин жюрбежюр пIипIариъ ккебгъна, хъа варитIан гъатиди, учIруди, инсафсузди хусуси метлеб айи дявдин операцияйин дахилнаъди гъябгъюра. Дидин натижйирилан закур ихь дюн’яйиъ уьлкйирин арайиъ экономикайин, политикайин, культурайин ва дявдин цирклиан аьлакьйир фицдар шулуш, халкьарин арайиъ вуйи ихтиярарин институтар улихьганси лихури гъузруш, дарш марцциди батIул шулуш — гьамцдар ва хайлин жара важиблу месэлйир асиллура хьибди. Жикъиди кIуруш, гъи Украинайиъ кьюб къаршу кьувватарин, саб терефнаан – аьсрариинди халкьар ва уьлкйир лукIар апIури, дурарин девлетар бацакк ккаъри, азмиш духьнайидарин ва тмуну терефнаан ватандин азадвал, инсанарин ва миллетарин арайиъ дуствал ва барабарвал заан метлебарси гьисаб апIурайидарин арайиъ аьхю дяви гъябгъюра. Гъаних невснан лукIариз къаршуди удучIвнайи агъзрариинди эскрарин арайиъ ихь табасаран баярра цIиб дар. Думу игитарикан сар Мурад Нуров (шиклиъ) ву.
Мурад Нуров I994-пи йисан 22-пи июнди Мягьячгъала шагьриъ бабкан гъахьну. Балин адаш Имамутдин Нажмудинович ихь республикайиъ заан пишекарвалин дережа айи гьюрматлу духтир вуйи, хъа дада Рафият Мягьямадовна – халачачи. Нуроварин хизандин бина Хив райондин Ургъа гъул’ан ву. Гьяйифки, Имамутдин Нуров, чан балин игитваларикан мялум хьайиз, кечмиш гъахьну. Думу ватанпервер касдин баяр жараси хьузра мумкин дайи, фицики бицIивахтнаанмина Мурад ва дугъан аьхюну чве Рамис (хъа думу, адашдин пишекарвалин рякъ кадабгъну, гьамус ужуб тажруба ади лихурайи хирург ву) абйир-бабари ватанпервер гьиссариинди, фуну вахтнара инсандиз кюмекназ хил гьачIабккруси тербияламиш дапIнайи веледар ву.
Мягьячгъала шагьрин ЦIийи Хушет посёлокдин 6-пи нумрайин мектеб ккудубкIу Мурад Вариурусатдин государствойин юстицияйин университетдин филиал вуйи Кафари Кавказдин правовой академияйик урхуз кучIвру. Дидин кьяляхъ, Рязань шагьрин военный командный училищера заан аьгъювалариинди ккудубкIну, бицIину лейтенант ччвур тувнайи Мурад Нуров, 2017-пи йисан Урусатдин оборонайин министерствойихъди контракт йибтlну, Ватандиз гъуллугъ апIуз хъюгъру. 2023-пи йисан думу чан хушниинди хусуси метлеб айи дявдин операция гъябгъюрайи районариз гъягъюру. Гьамусяаьт ихь ватанагьли I04-пи девизияйин десантаринна гьюжум апIру 345-пи дестейиъ а.
Мурадди чан уьмрин юлдаш, полицияйин офицер, аьхюну лейтенант Диана Андреевнайихъди Рафият кIуру риш тербияламиш апIура.
«Халис табасаран хизандиъси, узура бицIидихъанмина йиз адашди ва дадайи зегьметнахьна вердиш вуди, ляхин апIуз юкIв хъади, читинвалар ккагъуз гьязур вуди ва ватандихьна ккунивал ади тербияламиш гъапIунзу. Гъи йиз уьмрин метлеб гьадму гьиссар йиз веледдихьна ва аргъаж шулайи насларихьна рукьуб вуйиз. Военный гъуллугъчи хьуз байвахтнаанмина фикриъ айиз, думу пише гьадмугантIан ккунибра вуйзуз. Магьа гъи взводдин командир вуза. Фицдар читинвалар алахьурашра, Ватандиз гъуллугъ апIру рякъ ктабгъбиин жизбикьан швумал дарза. Миллетчйириз мютIюгъ шлу кас дявдин майдандиз удудучIври, кIураза. Хъа узу эл хътабгъури имбукьан гагьди, намуслуди Ватандиз гъуллугъ апIидиза», – кIура игитри.
Мурад Нуров гьюкуматдин ва чан командованиейин терефнаан швнуб-саб гьюрматнан ва чухсагъул мялум апIбан кагъзарихъди, медаларихъди лишанлу дапIна. Улихьнаси гъахьи женгариъ дугъу чан уьмриз хатIа айивализ дилигди, дявдин чюлиан женгнан юлдшариз удучIвуз кюмек гъапIну. Мурадлин кIван ачухъвализ, Ватан ккунивализ, юлдшарин гъайгъу зигувализ, дирбаш’вализ ва сабдихьанра гучI кадарди чпи гюллдин цIиккан ккадагъувализ лигну, женгнан юлдаш – эскрари ихь ватанагьлийикан мяъли ктабгъну.
Мурадстар эскрар варидариз нумуна ву. Мицистар игитарихъди ухьу гъалиб хьидихьа!
