Зубайдат Шябанова

16-пи апрели йигъан Табасаран райондин глава Мягьямед Къурбановди хусуси метлеб айи дявдин операцияйиъ кечмиш гъахьи Жулжагъ гъулан бай Расим Мягьямедялиевдин Кьягьялвалин орден дугъан багахьлуйирихьна тувбаз бахш дапIнайи гюрюш кIули гъабхьну.
Главайихъди вуйи гюрюшдиз Расимдин адаш – Сабир, дада Гюльмира ва дугъан ачIни гъахьи уьмрин юлдаш Сурижат дуфнайи. Муниципалитетдин кIулиъ айирин хил’ан гъакIи игитриз вуйи орден дугъан 4 йисаъ айи бицIи Марьямди гъадабгъну.

Гьюкуматдин пешкеш тувру мажлисдиъ райондин военный комиссарин заместитель Надир Шихягьмадов, райондин жямяаьтлугъ палатайин председатель Аьлимирза Гьясанов, райондин агьли касарин Советдин кIулиъ айи Кумалат Кумалатов, Жулжагъ сельсоветдин глава Шагьимерден Гьясанаваев, гьадму вахтна райондиъ айи А.Ф.Можайскийин ччвурнахъ хъайи военно-космический академияйин вакилар, подполковникар Аьбдулнасир Мягьямедов ва Александр Войтович иштирак гъахьну. Уч духьнайидари варидари игитрин багахьлуйириз мани ва гьюрматнан гафар гъапну ва игит эскер тербияламиш апIбаз чухсагъул мялум гъапIну.

«Расимдин гьунар учу саб вахтнара гьархударча ва ичв хизандин гъайгъушнаъ хьидича. Учву мид’ин умудлу духьну ккундузуз», – гъапнийи, кечмиш гъахьи офицерин багахьлуйирихьна илтIикIури, Мягьямед Къурбановди.

Лейтенант Расим Мягьямедялиев 1993-пи йисан Табасаран райондин Жулжагъ гъулаъ бабкан гъахьну. Думу сифте Забайкальский крайиъ танковый батальондин взводдин командир вуйи. Гьадушв’ан СВО-йиз гьаъну. Июлин 8-пи йигъан Донецкдин терефнаъ чан частнахъди сатIиди ВСУ-йихъди вуйи гъати женгариъ Расим кечмиш гъахьну.
Ватанди чан улихь дивнайи метлебар тамам апIурайи вахтна улупу игитвализ лигну, Расим Мягьямедялиев Урусатдин Президент Владимир Путиндин къарариинди Кьягьялвалин ордендиинди лишанлу гъапIну.